كود كازا//

الحاجة الحمداوية، أيقونة العيطة المغربية، توفات اليوم بعدما دوزات كثر من 70 عام فالميدان الفني، وتعتبرات وحدة من بين أقدم الفنانات المغربية اللي دخلو المجال وثراوه بإبداعهم.

الحمداوية قبل ما تودعنا كان ليها آخر عمل فني هذي ستة أشهر بعنوان “حاضية البحر”، وهي فيرسيون جديدة لأغنيتها الشعبية المعروفة، اللي أداتها المغنية المغربية الشابة كَزينة عويطة.

هذ العمل اللي كان إنذار بإنهاء مسيرة الحمداوية الفنية، بحيث علنات اعتزالها من بعدو، وصرحات فندوة صحافية انها “عيات ومابقاتش قادرة تكمل”.

والثقة اللي عطات الحمداوية لكَزينة، المغنية الشابة اللي عايشة فميريكان، كبيرة بزاف، بحيث عطاتها موروثها الفني الشعبي كامل، ومنحاها كل الحق فالتصرف فيه، من بعد قرارها بالاعتزال.

والحمداوية بقات ديما على تواصل مع “كَزينة” من بعد هذشي، كتدعي معاها وكتشجعها وكتساندها، حتى تزاد عليها الحال ودخلات للسبيطار، قبل ما يدخلوها قسم الإنعاش هذي يوماين وتسلم روحها.

أغاني كثيرة تعرفات بيهم الحمداوية وغيبقاو من الخالدات، فبالإضافة لأغنية “حاضية البحر”، كاينة “الكاس حلو”، و”دابا يجي”، و”ومنين انا ومنين نتا”، وغيرها بزاف.