كود سبور//
الجامعة الملكية المغربية لكرة القدم دارت خطوة مهمة فعز أزمة فيروس كورونا المستجد، بعدما قررت صرف منحة الشطر الثالث لجميع الأندية سواء القسم الأول أو الثاني أو الهواة.
فوزي لقجع، رئيس الجامعة راعى معاناة الأندية واللاعبين، اللي كايعانيوه جراء الحجر الصحي المفروض عليهم، وصرف المنحة اليوم الجمعة عن طريق تحويلات بنكية على أساس أن تتوصل جميع الأندية بفلوسها نهار الاثنين المقبل.
بزاف ديال الأندية نوهت بهذه المبادرة، اللي قام بها رئيس الجامعة في عز أزمة كورونا، في الوقت اللي بعض الفرق عبرت عن استيائها بعد خصم مبالغ مهمة من منحتها، لحقاش عندها نزاعات مع لاعبين ومدربين.
وخا هذه الفرق اتفقت مع لقجع على خصم مبالغ النزاعات في اجتماع المكتب المديري الاخيرة، إلا أنها ما تقبلاتش الأمر في هاد الوقت، وهي غير محقة في ذلك، لأن اللعابة، اللي عندها معاهم نزاعات من حقهم حتى هوما يتوصلوا بفلوسهم، لحقاش عندهوم عائلات كيصرفوا عليها.
لهذا كان فوزي لقجع حكيما فاش التفت لهاد الفئة من اللاعبين، اللي عندهم نزاعات مع الأندية ومسؤوليها، اللي كان من واجبهم يؤديوا ما عليهم مشحال هادي، بدل إرغام اللاعبين على وضع ملفاتهم لدى لجنة النزاعات بالجامعة.
وتجدر الإشارة إلى أن الجامعة تبرعات بمليار سنتيم لفائدة الصندوق الخاص بتدبير جائحة كورونا، وهو مبلغ مهم واكثر بكثير من مساهمات العديد من المؤسسات الرياضية بحال اللجنة الوطنية الأولمبية وجامعة ألعاب القوى.
