عفراء علوي محمدي- كود//
طاحت الممثلة المغربية نجاة خير الله، البارح الجمعة، بكريز، وهي كتبكي وتغوت قدام الصحافة، بسبب تنمر المتابعبن ليها، وإدانتهم ليها، فالوقت اللي قالت انهم خاصهم يوقفو معاها ضد المتحرش المفترض بيها، الممثل طارق البخاري.
وقالت خير الله، وهي فحالة هستيرية، انها مجرد “إنسانة”، وأن هذشي كيوقع ليها كثير عليها ومابقاتش قادرة تتحملو.
وصرحات خير الله، فيوم دراسي من تنظيم الجمعية المغربية لحقوق الضحايا، انها لاحظات الكم الهائل ديال التنمر عليها ففيديو فيوتيب فإحدى القنوات، اللي كانت كتنقل مباشرة الكلمة ديالها، وان هذشي المها بعد 22 عام فميدان التمثيل.
وزادت: و”لا كومنتير واحد معايا، ولا دعم، علاش؟ حيت انا مرا..”
وكان سبق لعضوات وأعضاء جمعية الدفاع عن حقوق الضحايا، اللي جلهم محامين، تبناو قضية خير الله لمآزرتها امام القضاء.
وكانت خير الله خرجات بسكرينات على حسابها على “فيسبوك” كتوثق تحرش الممثل البخاري بيها، قبل ما تتابعو قضائيا، بينما هوا كينكر هذشي وكيعتبر دوك السكرينات مفبركة.