كود كازا ///
مجموعة « بيست فينانسيار » المساهم المرجعي ف »لابيل في » اعلن انو ولى مساهم غير باسهم قليلة ف »هولدينك تريبوليس »
هاد المساهم شرا شي 70 بالمائة مجموعة النشر « ايكو ميديا » و »ايكو برانس » مدرسة للاعلام واذاعة « اطلانتيك ». هاد المجموعة فيها اسهم بهولدينكات كبيرة بشي 20 بالمائة٬ لكن اكبر المساهمين نادية صلاح رئيسة تحرير “ليكونوميست” وعبد المنعم دلمي مدير نشر “الصباح” و”ليكونومسيت” واخرين.
هاد 70 بالمائة غادية تكون ديال نادية صلاح وعبد المنعم دلمي.
ولكن ديال من هاد “تريبوليس”؟ فحسب حسب اعلان ليگال تنشر ل »ليكونوميست » قبل ايام فان حديد للاستشارة اللي هو فيسكاليست معروف اسس شركة مجهولة ف4 ماي 2020 اي مع كورونا فيروس وهاد الشركة اسمها « تريسلوليس هولدينك ومقرها زنقة البحتري بحي گوتيي بانفا فكازا.
راس مالها الاجتماعي 11 مليون و160 الف درهم. هاد الشركة فيها متصرف هو رياض مولوي
هاد مولوي باين غير مسخر لشي حد. ما عندو علاقة لا بالاعلام ولا بالاستثمارات. فوقت قصير ولى مول هولدينك. كيشغل منصب فالباطرونا.
الصحافة ديما الاستثمار فيها ماشي ساهل وماشي اي واحد. هاد المجموعة كانت بغات تشريها مجموعة خدامة فالعقار هادي سنوات وعطات 200 مليون درهم وتم رفض هاد العرض لان صحاب الشركة كانت طالبة 360 مليون درهم.
دابا هاد 70 بالمائة تقدر تكون حسب تقديرات مصادر “كود” فحدود 70 مليون درهم صافي ويقدر يوصل الثمن لشي 120 مليون درهم. الازمة والضربات اللي كلاتها الصحافة المكتوبة خلات المبلغ ينقص بزاف. دابا غير مقر المؤسسة اللي كاين فشارع المسيرة الخضرا فكازا ثمنو تقريبا شي 40 مليون درهم. هو ملك للشركة،
هاد المبلغ موحالش فيه المطبعة.
