ممثل تركي مشهور شرا مدرسة وريبها.. نتاقم من المعلمين لي كانو كيضربوه ملي كان صغير
علي الصافي – كود العيون ///
شكون المتخصص فالعلاقات المغربية الاسبانية؟ هذا سؤال شوية بليد ولكن مزيان يتطرح. اول حاجة خاص المتخصص هو امرين اثنين. يكون ولد الثقافة الاسبانية اي يكون متشبع بيها باكلها بثقافتها. جوجت المناطق فالمغرب عندهم هاد الخاصية. الصحراء الغربية فالجنوب المغربي والشمال من لقصر لكبير وطنجة وتطوان وانت غادي.
الامر الثاني على اطلاع بما يقع فاسبانيا مع تعليم جامعي يسمح ليك تفهم هاد الشي.
فالصحراء كاين فهم كبير بزاف وكاينين ناس على ثقافة كبيرة بزاف امثال العربي ولد النص وغيرو. تكلم مع اي شاب مثقف من هاد المنطقة٬ غادي تكتاشف حجم هاد الثقافة.
ثم كاين مدن الشمال اللي كاين باحثين فالتاريخ المشترك المغربي الاسباني من ايام الاندلس ثم ديبلوماسيين امثال الراحل العربي المساري اللي خلى كتب كثيرة وكاينين ديبلوماسيين عندهم اطلاع كبير ومعرفة عميقة بحال عبد القادر الشاوي وعمر عزيمان وعبد السلام البركة وكريمة بنيعيش وخوها ومحمد بنعيسى وصلاح الدين مزوار.. هادو ايلى بغاو يكتبو راهم كيؤلفو كتب كثيرة. عندهم واجب التحفظ وفيهم خصلة التواضع. كاينين كتاب صحافييين قافزين فهاد الميدان بحال عبد الحميد البجوقي وحسين مجذوبي…. واللي كيجمع هادو واللي سبقهم هو الانتماء للشمال اللي خضع للاستعمار الاسباني.
التخصص كاين وبزاف ولكن معاه التواضع. التخصص ما كيجيش بعشرين عام باسبانيا او تعرف لغة هاد لبلاد. وللي قال راه متخصص علاش ما بانش فالازمة الاخيرة؟ لسبب بسيط انهم ما عندهم علاقة بالتخصص.