كود الرباط//
أكد حمد رحو، رئيس مجلس المنافسة، مجددا بلي ملف الأرباح المشكوك فيها لي حققات شركات المحروقات في الفترات السابقة، باقي مستدش وغايتعاود فيه التحقيق بمجرد يتم إخراج مشروع قانون حرية الأسعار والمنافسة، ومشروع قانون متعلق بمجلس المنافسة.
هنا كيقصد الشكوك لي كانت موضوع بحث وتحقيق ديال المجلس السابق على شبهات تواطؤ بين الشركات فتحقيق أرباح كبيرة، هاد الموضوع مزال متسدش وفق رحو.
أما بخصوص الأسعار لي شاعلا دبا عالميا وعندها تأثير على السوق الوطنية، رحو ف برنامج حديث مع الصحافة على القناة الثانية، قال بلي مجلس المنافسة خدام تقرير قريب يخرج على علاقة الأسعار ديال المازوط وليصانص لي شاعلة فيها العافيا بالمغرب بالسوق الدولية لي كاينا دبا.
التقرير لي غادي يخرج فاواخر شهر يوليوز الجاري غايكون على هاد الأسعار الدولية لي شاعلة ف المحروقات ، حسب ما صرح به رحو ف برنامج القناة الثانية.
وبخصوص التقرير السابق حول تواطؤ الشركات لي فيه جدل كبير، قال رحو بأن هاد الملف ماتسدش وغايتعاود فيه تحقيق.
يشار بلي موضوع المحروقات ف الفترة السابقة فاش كان البي جي دي فالحكومة كانت فيه مزايدات سياسية كثيرة، واستهداف لشركة معينة، من بعد خرج بلاغ الديوان الملكي وضح الأمور ورجعها للسكة الصحيحة، وتم تعيين رئيس جديد لمجلس المنافسة.
