كود- الرباط ///
نهار عشرين نونبر الماضي عائلات معتقلي اكديم إيزيك لي كانو فالدار لي كاريين فسلا ترزاو فتيليفون سامسونغ ج 7 وآيباد 4 وتيليفون نوكيا. شفرهوم واحد السيد من أصحاب السوابق العدلية ينحدر من العيون كان جا يريح معاهوم فالدار.

إلى حد هنا الأمر يتعلق بسرقة عادية. الشفار بانت ليه فالآيباد والتيليفونات وبات ما صبح، لكن لي ماشي عادي هو الحالة لي دارو عائلات معتقلي اكديم إيزيك ومناصري للبوليساريو على هاداك الإيباد لي حسب مصدر “كود” فيه أسرار ديال المعتقلين وبعض المواد الإعلامية لي كانو كيوجدو الجناح الإعلامي ديالهوم. فيه فيديوات وإيميلات وغيرو عندها ارتباط بقادة ديال البوليساريو في الخارج وكملو من عندكوم. هاد الناس ماقدروش يوصلو لهداك لي شفر حيت ما بقا بان ليه أتر لا في العيون ولا فسلا.

فالاخير حسب ما علمته “كود” ما لقاو ما يديرو غير انهم يديرو شكاية ومحضر عند بوليس سلا باش يشدوه من جهة ومن جهة اخرى دارو تصاورو فالفيسبوك باش لي شافو يبلغ عليه لأن الأيباد والتيليفون ثمين بالنسبة ليهوم