هناء ابو علي كود كازا ///

قررت السلطات الصحية فالعيون منع الانفصالية اميناتو حيدار باش تطلع فالطيارة ديال لارام اللي كيدير رحلة بين العيون ولاس بالماس هاد الليلة الاربعاء 18 نونبر 2020.

القرار فيه انو تم ابلاغ المصالح فمطار الحسن الاول بالعيون بالجنوب المغربي باللي المسافرة امينتو حيدار فيها “كورونا فيروس”. واوضحت المصادر ان مصالح الصحة فالعيون ابلغتها بقرار منعها من السفر الى حين تعافيها من المرض.

هي دارت فيديو كتقول باللي هاد المنع ماشي قانوني حقاش السلطات الاسبانية ما كتطلبش التيست باش تدخل لحدودها حتى يوم 23 نونبر اللي جاي.

دابا اللي خاصو يتحمل المسؤولية فهاد القضية جوج: وزارة الصحة وخاصهم يخرجو يهدرو ويدافعو على مواقفهم. والثاني هما الخطوط الملكية المغربية “لارام” حقاش رفضات تهز هاد المسافرة.

راه ماشي شي جهة اخرى كيف قالت اميناتو حيدار. خاص كاع اجهزة الدولة الاخرى تبقى بعيدة حقاش ما عندها علاقة.

وزارة الصحة ولارام هما الوحيدين اللي خاصهم يديرو بيانات وتصريحات فهاد الموضوع اللي ممكن ياخد ابعاد اخرى.