نجوى المالحي –كود //

واش البوسان حرام؟ واش تنفس الهوا حرام؟ واش الحياة حرام؟ عند بعض الدواعش المتخلفين والمكبوتين، كولشي حرام.

مناسبة هاد الهضرة، الجماعة ديال المكلخين لي خرجو كيسبو في “ممثلة” مغربية-ايطالية سميتها ميلا سواريز، حيت باست السطارليط الشيلية-الايطالية اليسا دو بانيكيس، في الطابي روج في مهرجان البندقية في نسختو الـ77

ميلا لي ناض عليها الصداع وسبوها، الأصل ديالها من المغرب، وهاجرت للطاليان، بعدما اختارت تحيد الحجاب وتعيش حياة جديدة. وكتعرف اليسا من خلال مشاركتهم بجوج في برنامج الواقع الايطالي ” Big Brother الأخ الأكبر”.

ميلا واليسا نجحو يخلقو البوز، غير هو كان انواع، فالعالم المتقدم بزاف عجبهم الـshow لي دارو، واخرين عيبو عليهم حيت ماحتارموش البرتوكول الوقائي من كورونا لي أوصت به ادراة المهرجان. وفي المغرب، طبعا، ماسوقو لا لكورونا لا لكوڤيد لا والو، ديرونجاتهم غير البوسة.. ناس كيكرهو الحياة، وباغيين كولشي يعيش مغموم ومهموم وتابع الناس بحالهم.