كريم الشركي-كود///

الخطوة لي دارت الجزائر باستدعاء سفيرها من الرباط للتشاور، كان خاص يديرها المغرب هادي مدة ويطرد سفير الجزائر لي كتعادي وحدتنا الترابية منذ عقود.

رد الفعل المغربي على الجزائر دائما كان بارد، وهادشي خلا الجزائريين ديما يتجرأو علينا، وعمر المغرب مارد على هاد التجرؤ بسحب السفير او طرد سفيرهم، رغم أنه فأوقات كثيرة الجزائر كانت كتستعمل فلوس شعبها ونفوذها باش تغرق لينا الشقف.

أخيرا المغرب تحرك ودار ردة فعل ملي كانت الجزائر باغيا تطرح مشكلة الصحراء فمنظمة دول عدم الانحياز، ناض المغرب تا هو طرح مشكل القبائل فتصدمت الجزاىر ودارت لي دارتو.

هادشي لي دارو المغرب تعطل فيه بزاف، وكان خاصو يديرو هادي مدة ويخدم عليه، لأن شعب القبائل يستحق التحرير من تجبر حكومة الجزائر، وطرد سفير دولة كتعتابر من اقدم دول الاحتلال فإفريقيا كان ضروري من هادي مدة.