محمد سقراط-كود///
شحال هادي فين مكان شي مغربي عالم أو مفكر كيتشهر برا ويتقدر وتعطاه جوائز، كنتي تلقى المغاربة هنا كيتحسرو ويسبو في بلادهم على أساس أنها بلاد فيها العباقرة والنوابغ على الجهد ولكن للأسف مكاينش فين يبانو، وحتى كيمشيو لأوروبا ولميريكان وكيتوفرو ليهم الظروف الملائمة تما كتظهر العبقرية ديالهم وطبعا كيستافدو منهم البلدان الأخرى عوض تستافد منهم بلادهم، بنادم مصمك وحاس براسو عبقري غير تزاد في البلد الخطأ، بحال أن السلاويين كلهم الى مشاو لميريكان غادي يوليو منصف السلاوي، حنا ماشي شعب ذكي حاليا حنا بين وبين في الذكاء والشكل واللون، ماشي أذكياء ولكن مرة مرة كيخرج من وسطنا شي عبقري أو عبقرية، ماشي زوينين ولكن مرة مرة كيخرج من وسطنا شي بوكوص أو بوكوصة بمعايير عالمية، وطبعا من ناحية اللون حنا مكحلين مابيضين حنا شفافين كناخدو لون البلاصة فين كاينين.
المغرب بحال شي راجل من الرحامنة عندو ربعة ديال الولاد جوج بقاو معاه يعاونوه في البلاد ويسرحو الغلم ، وجوج قافزين واحد مشا لمراكش وحسن الوضعية شوية وبقا مرة مرة يسيفط لباه شي رايلات، وواحد مشا حارك لأوروبا وخدم ورقع الحالة وشرا لباه دار وسيفطو للحج، كون بقاو كلهم حدا باهم كاع مكانو ينفعوه بحال كيما هاجرو ودارو مستقبل وحسنو وضعهم الإجتماعي، راه هادشي لي طاري في المغرب، الدري كيكون غير هايم بدون وجهة في السراغنة أو لاربعة الفقيه بن صالح، حتى كيدبر على راسو ويمشي للغربة، وكيولي مرضي واليديه ومرضي البلاد ويسيفط الأورو، ويجي في الصيف يروج القضية وكتستافد منو البلاد كثر من كون بقى هنا.
عوض دوك البكائيات ديال ها الكفائات كيمشيو ويخليونا مع المسهوكين، وا على بلاد هادي كاع الناس الزوين كيهاجرو شكون غادي يبقى هنا، راه العكس أي واحد هاجر راه خاص البلاد كلها تفرحليه، لأنه الى كان قراي وذكي وعندو موهبة فراه كيصقلها برا في أحسن الجامعات والمدارس ويخدم في أكبر الشركات، ونهار كتوقف عليه بلادو راه كيعاونها إنطلاق من مكانتو الرفيعة لي وصلها وإعتمادا على تجربتو وعلاقاتو ومكانتو، عبقري مغربي في الغربة مفيد لبلادو كثر من كون بقا هنا، حيت مكاينش فين غادي تبان هاد العبقرية ديالو حنا بلاد على قد الحال وغادين مقاتلين مع الوقت، شوفو غير كيفاش نفعونا الكفائات المغربية لي هاجرات ودارت مستقبل عظيم على برا، سمير مشهور كمثال لي عندو دور كبير في حصول المغرب على عدد كبير من جرعات لقاح أسترازينيكا، في الوقت لي دول غير حدانا كيشوفو اللقاح غير في تلفازة.
