عفراء علوي محمدي- كود//

خصص صندوق الإيداع والتدبير 8 آلاف سرير موجودين فمختلف الفروع اللي تابعة ليه، فأوطيلات، وأحياء جامعية، ومراكز الاصطياف والتخييم، ووضعها رهن إشارة الدولة باش تعتمدها فعلاج المصابين بفيروس “كورونا” المستجد، اللي تصابو بيه لحد الساعة 257 واحد، وقتل منهم 10.

وحسب بلاغ للصندوق، صدر اليوم الخميس، وتوصلات “كود” بنسخة منو، كتتوزع الأسرة اللي خصصها الصندوق على لوطيلات اللي تابعين فمجموعة “مداييف”، بما مجموعه 4 آلاف سرير، موزع على 12 لمدينة فالمغرب، وعلى الأحياء الجامعية اللي كاينة فالرباط وكازا ومكناس والجديدة ب3 آلاف و500 سرير، بالإضافة ل450 سرير كاينة فمراكز التخييم فمراكش والجديدة وإفران وبوزنيقة وفاس وريستينكَا والسعيدية.

بالإضافة لهذشي، الصندوق وضع رهن إشارة الحكومة الإمكانيات ديالو البشرية والمادية والمالية، باش يواجه تفشي الفيروس، والتداعيات ديالو على الاقتصاد الوطني، لكن فنفس الوقت يضمن استمرارية الخدمات ديالو فالصالح العام ديال المواطن.

وكان الصندوق تبرع ب1 مليار ديال الدرهم لفائدة الصندوق اللي دار من أجل مكافحة انتشار جائحة “كورونا”، كيف دعا الموظفين ديالو باش يتبعو من جهتهم بصاليرهم لهذ الصندوق.