عفراء علوي محمدي- كود//
سكيزوفرينيا المغاربة مامفهوماش نهائيا، من جهة كتلقاهوم هذ الأيام على مواقع التواصل الاجتماعي كيسبو ويعايرو فالمثليين والترانس، لكن فاش كتجي تقلب كتلقاهم هوما اللولين فلاليست دالناس اللي كيتفرجو فيهم فالمواقع الإباحية، والإحصائات اللي كينشر موقع البورن المعروف PornHub كل عام كتفضح هذشي.
فتقرير إحصائي للموقع سنة 2017 على الزوار اللي كيقلبو على محتويات كتتعلق بفئة الترانس أو “العابرين جنسيا”، المغرب كيجي فالمرتبة الخامسة عالميا، بعد البرازيل، الأرجنتين، كلومبيا وفينزويلا، هذ المرتبة ماشي ساهلة بحكم أن التصنيف كيشمل جميع الناس من دول العالم اللي كيزورو الموقع، وبالتالي جاية شوية غريبة يكونو خامس ناس كيتفرجو فليترانس هوما المغاربة، فالوقت اللي كيقيلو يعايرو فيهم ف”فيسبوك”.
فتقرير آخر، للموقع سنة 2018، واللي كيشمل رصد جميع الاحصائيات المتعلقة بزوار الموقع فهذ العام، كيبين بللي أكثر كاطيكَوري المغاربة كيتفرجو فيها وعاجباهم فالموقع هي ديال المثليات أو “الليسبيانات”، إذن كاينين اللي كيتفرجو فيهم بالنهار والليل ويتفونطازماو عليهم، وف”الفايس” كتلقاهم هاجمين عليهم بالسبان، ويوصفوهوم بأقبح الأوصاف.
المغاربة اللي كيحقدو على أفراد مجتمع “الميم عين”، وكيكرهوهم وكيحقدو عليهم، وخصوصا فهذ الشهر اللي كيتعتبر “شهر الفخر” اللي كتحتفل بيه هذ الفئة، هوما نفسهم المغاربة اللي ملهوفين عليهم، وكيتفرجو فالبورن ديالهم، بحال ديك القضية ديال “عيني فيه مانبغيه” اللي كتفضح الانفصام الكبير فشخصية اللي صعيب يتلقى ليه جي علاج.
وهذو روابط التقارير الإحصائية بجوج:
