كود الرباط//

علمت “كود” من مصادر مطلعة ان البلجيكيات لي تطوعو ف تبليط طريق واعرة نواحي تارودانت، رغم للتهديدات لي تعرضو ليهم ف فايسبوك، دوزو ايامات زوينة فتارودانت وعجباتهم المنطقة، بل طبقو برنامجهم ومشاو دارو سياحة ف الصويرة لبارح وباتو فيها.

وحسب اخر المعطيات لي توصلت بها “كود” فان هاد الكروب ديال المتطوعات والمتطوعين لي عددهم 37 دبا متواجدين ف مطار مراكش باش يديرو الاقلاع من المغرب ف اتجاه الديار الاوربية.

اليوم ف صباح دوزو ساعات زوينة دارو سياحة نشطو مع راسهم، طبعا المصالح الامنية كانت متبعاهم مزيان كانت حماية بدون مايديرو ليهم ازعاج يعني عن بعد.

وفي هذا الصدد قال سن آيت عدي رئيس جمعية تيويزي ف تارودانت اللي دارت شراكة مع جمعية بوورد البلجيكية اللي جابو المتطوعات باش يقادو طريق واعرة ف دوار اضارنومان بإقليم تارودانت، بأن هاد الكروب عجباتو تارودانت وفرحان بهادشي لي دار فالمغرب واخا دوك التهديدات نتمناو ميكونش تأثير على التنمية بالمنطقة.

وحسب ايت عدي، الذي ربط الاتصال مع منسق مجموعة المتطوعات والمتطوعين ف جمعية بوورد، فإنهم عاشو يومين زوينن سواء ف الصويرة ولا مدينة تارودانت، السياحة كاينا النشاط كاين والحماية كاينا.

وكانت مصادر “كود” كشفت أن هاد الفوج لي شارك ف التبليط غادر اول امس الدوار ومشا لمدينة تارودانت حيث عندهم برنامج فيهم يومين الى 3 ديال السياحة، لكن تلقوا اتصالات من طرف عائلاتهم كيحذروهم من البقاء ف المغرب وطلبو منهم يرجعو بحالهم.