محمد سقراط-كود///

واخا السيتكوم لي دار سعيد الناصري حامض وواخا مشفور حرفيا مازاد حتى حاجة من عندو من سيتكوم ميريكاني، إلا أن بزاف ديال المغاربة كانوا متعاطفين معاه وكيدافعو عليه وبالنسبة ليهم راه أحسن مكاين، هادشي 1ماشي حيت أعمال سعيد الناصري واعرة وممتعة رغم أنها مشفورة وهادوك لي كيدافعو عليه ستمتعو بيها، ولكن راهم كيدافعوا عليه حيت سعيد الناصري مواطن مغربي من ذوي اللون البني ( بحال ديالي نيت) عندو وجه دياللي كنلقاوهم من ورا الكرارس ديال الخضرة فبيبان الجوامع ومن ورا الفراشات فالسويقات لي كنلقاوهم بجيليات خضرين حدا المخبازات، لي خدامين سيكوريتي فمداخل الشركات، لي عساسة فالعمارات، لي بايتين فالكوميساريات هاد الليلة والليلات الجايين، لي معمرين لحباسات، لي لابسين كسوة المخزن وكيسلخو فالمحتجين قبالة البرلمان، لون الأساتذة المتعاقدين وحتى  المرسمين( فالأعوام الأولى)، لون لعساكرية فالحدادة، وجه الدراري لي غادين للتجنيد الإجباري، بداك الموسطاج واخا داير لاباس ولكن باقي عندو وجه أغلب المغاربة لي عايشين الميزيرية، ملي كتشوفوا خاشيه فالدولة وفالتلفازة ومزطط راسو معاهموداير لاباس كتفرح، حيت واحد منا دخل وسط منهم وكلى حقو فالحلوة.

بينما ملي شفنا دريري بيض رطب نقي مشهور قاري لاباس عليه ناجح فحياتو ماخاصو تاخير كلى لعصا من عند بوليسي فالشارع وصور هادشي لايف، بزاف منا قالو مايمكنش يكون مادار ليه والو وتعاطفو مع البوليسي، طبعا حيت الدري كيمثل داكشي لي كنتمناو نكونوه ومايمكنش لينا، داكشي لي غادي نخدموا حياتنا كلها وعمرنا نوصلوه، داك الشعور ديال تكون جذاب ومحترم ومحسود لي عمرنا غادي نحسوه، داك الوجه ديال بنادم كابر فالظل وبالمهل واللون ديال عنقو بحال لون وجهو، ويديه كلها بلون واحد مافيهاش لاطراس ديال الشمس، بحال هذا طبيعي منتعاطفوش معاه لاننا كنحسدوه والوجود ديالو راه عنف معنوي يومي كيتمارس علينا، بحال ديك البوكوصة لي كتغتاصب وكتلقى المجتمع كامل كيرد ليها اللومة وكيرجع السباب للباسها ولزينها وشكلها، هادشي لي طرا ينا مع خونا.

بزاف ديال المغاربة كيعشو خيبة أمل إقتصادية، وعندهم يقين تام أن حياتهم ماغاداش تتحسن وأن الإرتقاء الطبقي وللى صعيب وبزاف، وداك بنادم لي كان كيجي من لعروبية ويخدم فاش ماعطى الله فالمدينة ويولد وليدات ويقريهم ويكبرو وينجحو فالحياة ويمارسو مهن محترمة تجيب الفلوس والفخر ليه وليهم، مابقاوش بحال هاد القصص وقلالو بزاف، دابا راه ولاد الطبقة الوسطى ولاو مشرملين ومصمكين وماباغيش يقراو، وحتى لي قرا وتدردب مع الحياة راه السقف ديال التوقعات هو برطمة وطوموبيل وشريك إقتصادي، وفالشارع الحديد المزيان والخدامي الواعرين والمطاعم وليبواط والمدارسكاينين فيهم غير كليميني، مغاربة ماضراباهمش الشمس راسهم مافيهش الضرابي من الصغر كيهضرو بلا مايرشوك بالبزاق دارجتهم قليلة ونقية، هادو ملي كنشوفوهم كلاو لعصا من عند البوليس أو وقعات ليهم شي حاجة مقودة فحياتهم كنعتابرو دكشي غير عدالة إلهية ونوع من رد الإعتبار، هاعلاش تعاطفو المغاربة مع سعيد الناصري ودافعو عليه بينما تهجموا على أمين الراضي وماتاقوش بروايتو.