26/04/2024 09:44
جنايات فاس فرقات 30 عام ديال السجن فجلسة وحدا على متهمين بـ”السرقات الموصوفة”
احمد الطيب ـ كود الرباط//
كيف يعقل ان وزير الصحة يتجاهل الاعلام الوطني وباغي اطمأن المغاربة واخاطبهوم من خلال منبر روسي، ماشي شي منبر عندو مكانة دوليا، ومنبر اماراتي تابع لتيار دحلان!! وكولشي عارف شكون دحلان وشنو باغي من المغرب.
مشا عند قناة الغد يدير معها حوار، هاد القناة النكرة لي بغات تلعب فالمغرب، وممعروفاش عطاها قيمة. وهادي شوهة للحكومة.
راه المغاربة لي كيموتو وكيعانيو ماشي رواسا ولا الدحلانيون.. شوفو فضيحة الوزير الصامت: عاد بغا يهضر ومع من مع اعلام دحلان لي معندو قيمة وباغي يركب على المبادرة الملكية ديال التلقيح
ثم مشا عند وكالة انباء سبوتنيك ولي هي منبر روسي مختص في البروباغاندا لصالح نظام بوتين.
علاش هاد الوزير كايتهرب من حوار مع الاعلام الوطني والاعلام الدولي المستقل لي كايطرح اسئلة حقيقية. و”كود” عندها شهادات اعلاميين مغاربة واجانب، اكدو على التصرفات الغريبة والمستفزة لهاد الوزارة معهم، لا حوار ولا تجاوب مع اسئلتهم. انها الوزارة الصماء البكماء.
كيفاش وزارة الصحة كاتقول لينا يالاه 37 بالمائة من اسرة الانعاش لي عامرين ومرضى كوفيد فكازا والعديد من المدن مالاقيينش بلاصة.
الوزير دار تعتيم ودابا يالاه بغا اهضر معانا من خلال اعلام روسيا ودحلان! راك اسي وزير الصحة لي كايعانيو معاها لمغاربة ماشي الرواسا والاماراتيين.
اييه هاد ايت الطالب، باغي يركب على مبادرة ملكية وينسب راسو الانجاز ديال التقليح.. حنا كنقولو ليك مبغيناكش ومبغيناش حوار دبا، ولا يشرفنا نتحاورو مع وزير يحتقر الاعلام المستقل والحر.
