عفراء علوي محمدي- كود//
نشرات الرابورة المعروفة “بسيكو كوين” ، على صفحتها ب “انستگرام”، تصاور ليها وفيديوهات وهي عامرة دمايات وجروح، قالت من خلالهم انها تعرضات لاعتداء شنيع، في الساعات الأخيرة من ليلة أمس الخميس، بمدينة الصخيرات، قرب الحي للي كاتسكن فيه.
وحسب ما قالو بعض المعلقين، فالمتهم الرئيسي في قضية الاعتداء على الرابورة العشرينية، وبنت مدينة الصخيرات، هو صاحبها القديم للي كان عندو معاها حساب لازم يصفيه، وهاتشي للي خلاه يتكرفص عليها، ويسيفطها بدماياتها لسبيطار الصخيرات.
“بسيكو كوين” تعرضات للاعتداء مرتين، المرة اللولة بالعنف المادي، والثانية بالعنف النفسي والرمزي من بعد ما سبوها شي متخلفين فالتعليقات ووصفوها بأشنع الأوصاف، ولاموها لأنها خرجات من دارهم فوقت متأخر من الليل.
للي معارفينش هاد الناس للي مازال عايشين فالعصور الوسطى أن كل إنسان، راجل أو مرا، حر فالوقت للي يبغي يخرج فيه، وكل إنسان عندو ظروفو الخاصة، والخروج بالليل أو بالنهار ماعمرو كان حجة باش نبررو الاعتداء والعنف والهمجية للي صبحات للأسف معشعشة فعقول عديدين.
