سهام البارودي – كود//

صعيب نوضو حنا نعطيو دروس فالانسانية و نبذ العنصرية لميريكان ! وواخا هاكاك مورا ديك الحادثة ديال جورج فلويد لي قتلو بوليسي ميريكاني ابيض خرجوا بزاف ديال المغاربة لابسين جلابة الطهرانية كايغوتو واك واك اللهم ان هذا لمنكر ! شوف هاد ميريكان بنت الحرام شنو كايطرا فيها ! شوف شحال كايحگرو الكوحل! و كاينفخو سدرهم و يبداو عليك ” لا فرق لابيض على اسود و لا لاسود على ابيض الا بالتقوى آ خويا” فحالا زعما هوما خاترين فهادشي ديال الحقوق و المساواة و نبذ العنصرية و قطعو الواد و نشفو رجليهم و دابا كايعطيو الدروس لميريكان ! يا ميريكان !

كاين شي وحدين يصحاب ليهم العنصرية هي ضد الكوحل و صافي! و نسا بأنه كايمارس العنصرية كل نهار على الاقليات الدينية و الجنسية ! و ديك العفطة لي عفط البوليسي على جورج فلويد و خنقو ! فايتين شفنا فحالها فالفيديوات على وسائل التواصل الاجتماعي كاتمارس على مثليين مثلا !

العنصرية عندنا مازال كاتمارس على الكوحل نيت! بزاف ديال الطلبة من افريقيا جنوب الصحراء و المهاجرين سواء لي خدامين بوراقهم او لي حارگين كلشي كايتشكا منها ! ماكايبغيوش يهزوهم مالين الطاكسيات ! ماكايبغيوش يكريو ليهم الديور ! بلا السبان و المعيور لي كايتعرضو ليه يوميا ! و شحال من عائلة مازال كاترفض انه ولدها يتزوج ببنت سمراء البشرة مثلا … و هادشي حتى المغاربة ذوي البشرة السمراء يقدرو يشهدو بيه.

العنصرية كانمارسوها على الاقليات الجنسية فاش كايشدوهم يتكرفصو عليهم فالزنقة و يشدوهم فالحباسات ، كاتمارس على بزاف ديال العيالات لي كايشوفو راسهم مهددين فالفضاء العام ، محرومين من مجموعة من الحقوق ، علاش فاش كاتقرر انه المرا غاتاخد النص فالورث حيت مرا ماشي قمة العنصرية ؟ و لا فاش كاتشوف بلي المرا خاصها تغطي راسها عاد تخرج ماشي عنصرية ؟! و لا فاش كاتقوليها بلي الشهادة ديالها غير جائزة ماشي عنصرية ؟!

العنصرية كانمارسوها على اساس العرق ! مازال عندنا عباد الله كايتعاملو معاك على اساس واش نتا عروبي و لا ريفي و لا جبلي و لا فاسي ؟! مازال عندنا العيالات لي كايقولو ليك ” بنت من نتينا ؟” ، مازال النكت و السكيتشات و المسلسلات كايصورو لينا السوسي ( الشلح) سقرام ! و العروبي ساذج و مكلخ ! و الفاسي خواف ….

العنصرية هي الهضرة لي لي خرا لينا واحد سميتو الكتاني مؤخرا لي قاليك بلي الانسان ماشي من حقو يسمي سميت “اكسل” حيت حقا ما حقا القائد الامازيغي اكسل هوا لي قتل عقبة بن نافع ! واش ماشي عنصرية انك تفكر تحرم انسان يسمي ولدو بالسمية لي بغا ؟! تشوف راسك و العرق ديالك و الانتماء ديالك و الدين ديالك اسمى من عباد الله كاملين ؟

مايمكنش نعطيو دروس فالانسانية لميريكان و حنا غارقين فالعنصرية تال النغانغ !