عفراء علوي محمدي- كود//

توفات طالبة مغربية قاطنة بأوكرانيا، اليوم الإثنين، متأثرة بجروح تصابت بيها فالكسيدة الخايبة اللي وقعات فمدينة زاباروجيا جنوب شرق أوكرانيا.

وهكذا وصلات حصيلة قتلى دهذ الحادث ل4 دالضحايا فالطوطال، بينما جوج طلبة خرين تصابو بجروح، وبستة بيهم من جنسية مغربية.

وحسب اتحاد الجالية العربية فزاباروجيا، واتحاد الجالية المغربية فأوكرانيا، اللي نشرو الخبر، فالأمر كيتعلق بالطالبة المسماة قيد حياتها ب(ر.ت).

وكانت وقعات الكسيدة ف17 شتنبر الحالي مع 8 دالعشية، حسب التوقيت الأوكراني، بحيث دخلات طوموبيل من نوع BMW، واللي كانو فيها المغاربة الثلاثة اللي ماتو فاللول، فطوموبيل خرا نوع Nisan، وهذشي اللي خلا الطوموبيل اللولة تفقد السيطرة، وتدخل فبوطو دالإشهار، وتشعل فيها العافية.

وطوموبيلة Nisan ماتضرراتش بزاف، وكانو فيها 3 ديال المغاربة تصابو بجروح متفاوتة الخطورة، ومنهم اللي حكا للبوليس آش وقع بالضبط.