كريم الشركي – كود //

صحيفة لاراثون الصبليونية، المعروفة بقربها من المخابرات الاسبانية، دارت واحد المقال كيحاول يضرب فالمغرب، وبانه رجع مصدر للارهاب لجزر الكناري، وهادشي كولو، باش تنوض اسبانيا تحارب الهجرة السرية، بدعوى انها تصدر الارهاب لأوروبا.

الصحيفة الاسبانية، قالت أن واحد الدراسة أمنية ديال المخابرات بينات، أن بزاف ديال الدواعش حركَو من المغرب لاسبانيا، وخرجو فقوارب باتجاه جزر الكناري، وأن هاد الدواعش دابا مامعروفش مكان تواجدهم ويصعب تعقبهم بسبب العدد الكبير من الحراكَة لي وصلو لكناريا، واللي وصل عددهم ل23000 الف حراكَ اغلبهم مغاربة.

الصحيفة بغات تعطي انطباع بان الهجرة السرية وحش غاياكل الاسبان، وأنه كيصدر الارهاب دابا بعدما كان كيصدر ليهم المجرمين حسب ما كان الاعلام الاسباني يحاول به تصوير الحراكَة.

هاد الحرب الاعلامية لي كيديرها الاعلام الاسباني، هدفها جعل الهجرة السرية مصدر للمجرمين والارهابيبن، وتجييش الرأي العام الاسباني والاوروبي، باش ترجع محاربة الهجرة السرية مساوية لمحاربة الارهاب.