كود الرباط ///

علمت “كود” ان المجلس الوطني للصحافة= الجهة الرسمية الوحيدة اللي كتعطي بطاقة الصحافي المهني= غادية تخدم باش ما يوقعوش لفضايح اللي وقعو فمصر لتغطية الكان واللي كانو فيها معلمين وغيرهم عندهم اعتماد بلا ما يكونو صحافيين مهنيين.

القضية بدات باحتجاجات مهنيين من هاد الغزو لمهنة منظمة. الجامعة الملكية المغربية اكدت ل”كود” باللي قابلة انها دير اي نوع من الشراكة مع المجلس الوطني للصحافة باش هاد الملف يتسد رسميا.

رئيس المجلس الوطني للصحافة يونس مجاهد اكد ل »كود » فوقت سابق ان هاد القضية ديال الصحافيين الرياضيين خاصهم يخدمو عليها لحماية المهنة واكد انه الملف مازال ما تفتحش بحالو بحال شي جمعيات للصحافة وما فيها حتى صحافي مهني.

الاتجاه اللي غاديين ليه هو ان اي صحافي قدم اعتماد لحضور ماتش دولي او تغطية نشاط دولي غادي يتم اخبار المجلس الوطني بعدا واش هادو اللي قدمو الاعتماد مهنيين ولا اللا. حتى فالانشطة الدولية غادية تراسل الجامعة والمجلس المؤسسات بحال الفيفا والكاف واللجنة الاولمبية باش يتم تحيين المعلومات واللي ماشي ولد الحرفة ولا خرج منها ما ياخذش الاعتماد.