سهام البارودي – كود//

الخبر صادم بالنسبة ليا الصراحة ! النيابة العامة فالجديدة كاتابع ستة ديال الشباب بتهمة ازدراء الدين الاسلامي حيت كانو مقصرين و ناشطين بيناتهم و هوما كايغنيو “قمر سيدنا النبي” ! علاش صادم ؟ حيت قمة التناقض هادي و تراجع خطير على حرية التعبير فالبلاد ! واش هاد الناس لي تابعو هاد الدراري مافراسهمش بلي كل ليلة !و فأغلب بارات و بواطات المملكة كايتغناو بزاف د الاغاني كايتذكر فيهم اسم الله و الصلاة على النبي ؟ و بلي من اعز الاغاني لقلوب السكايرية مورا الاغاني على الميمة هي اغنية المسيرة الخضرا ” فرحي يا ارض بلادي ارضك رجعت حرة… صوت الحسن ينادي بلسانك يا خضرا” و فاش كايجي الوقت فين المغني كايقول ” الله الله الله الله” كلشي كايردد اسم الله بواحد الحماس منقطع النظير و بواحد الخشوع و الحب تقدر ماتلقاهش فشي بلايص اخرين!

و من غير اغنية المسيرة ! اغلب اغاني العيطة و لي كاتغنى فالعراسات و السبوعات و حتى البيران كاتبدا باسم الله و الصلاة على النبي ! العلوة مثلا عندها دخلة من أجمل ما قيل في حب الله و الرسول ” بسم الله بسم الله وا بويا راني قاصد باب الله وا شوية نترجاه ياودي العالي سبحانه” … و هنا كاترد عليه الشيخة تاهي بالابتهالات ” بسم الله باش بديت …. و على النبي صليت … هوا ياقوتة فالبيت … وا ماتو (أمته) صليو عليه…”
اغنية القايد العيادي كذلك فيها وحدة من احسن الدخلات ديال التضرع لله “وا يوا يوا … وا يا الوحيد آ يا ربي … هزيت عيني و تفاجا قلبي” هادي شيخة كاتغني وسط بار و تلقاها تاهي ضاربة ماتيسر من الكيسان و هادشي ماغايحبسهاش من انها تذكر الله فغناها و تحس بلي فاش كاتهز عينيها للسما قلبها كايتفاجا فين عندكم المشكل ؟ و الاجمل من هادشي انه الكلمات المستعملة فالتضرع و التوسل لله فالموسيقى ديالنا الشعبية بالدارجة اقوى بزاف من دوك الادعية سير موزير لي كايبغيو يفرضوها الشيوخ على عباد الله ! كلمات نابعة من عمق الثقافة الشعبية المغربية ! كلمات قالوها جدودنا و جدود جدودنا و هوما كايوصفو علاقتهم بالله !

علاش شنو فيها واحد سكران و باغي يغني على الله و يصلي على النبي و يحتافل بالمسيرة الخضرا ! حيت سكران راه مابقاش مومن ؟ صافي ماعندوش الحق يناجي الله ؟ يصلي على النبي ؟! حيت سكران راه طيرتوه من رحمة الله مابقاش محسوب على الملكوت ؟ ايوا لا مايمكنش هادشي ! راه فات الاقصاء لهيه و غانوليو فمحاكمة قروسطية كاتشير لتراجع كبير فحقوق الانسان فالمغرب و اهمها الحق فالتعبير !

هادوك الدراري ماآذاو حتى واحد ! مايمكنش نحاسبوهم حيت ختارو يذكرو الله و لا يغنيو على النبي و هوما سكرانين و لا كايشيشو و لا جالسين وسط بار و لا بواط ! راه الله هاداك و النبي هاداك و الله و النبي ملك للجميع و تاواحد مامنحقو يفرض على شي حد كيفاش يتواصل مع الله و فوقاش ! كاين لي كايتواصل مع الله بالصلا كيما كاين لي كايتواصل معاه بالغنا ! سوقهم هاداك و لهم الحرية الكاملة يغنيو شنو بغاو فينما بغاو!

راه حنا شعب هاكا ! عندنا الله و النبي و الاولياء و الصالحين جزء مهم من الثقافة الشعبية و من الاغاني ديالنا ( العيطة گناوة عيساوة الطقطوقة الحساني …) جميع الالوان الموسيقية ديالنا كايتذكر فيها الله و النبي ! و هاد الالوان كاترافقنا حياتنا كاملة فالعراسات و السبوعات و الجنايز و الصدقات ! كانغنيوها و حنا فرحانين و حنا مغبونين فشنو هوا المانع فأنه ترافقنا فالبيران و البواطات ؟!
و مانساوش بلي ديما كانساليو العرس و لا السبوع و لا القصارة بالدعاء لسيدنا صاحب الجلالة آآآو الله ينصر سيدنا سيدي محمد و الامير مولاي رشيد و الاسرة العلوية ! نفس النهج لي غادين عليه فالجوامع غادين عليه فالبيران ! فين كاين المشكل و اللسان يلهج بذكر الله ؟!

راه فالمغرب بنادم كايكون كايهضر ليك على شي طرف كايقوليك ” وااااا تبااارك الله على ترمة ” شنو غادير دابا مع هذا  ؟ تاهوا غايتمينط و يمشي يدوز الحبس حيت عبر على الانبهار ديالو بالترمة بديك الطريقة ؟ و لا فاش كاينوض المغني فشي عرس كايقول وا على شطحة عندها الله يعطيها الصحة ! نشدو المغني و الكوامانجي و مولات الشطحة و نلصقو ليهم ازدراء الاديان ؟!

راه قمة العبث هادي ! فين غادين بهادشي ؟ فين آوا غادي ؟