سهام البارودي – كود//
كانسمع بولد الشرقي ولد الشرقي من شحال هادي و ماعمري تسوقت حتى رشقات ليا نقلب عليه فاليوتوب ملي ولاو الدراري كايستعملوه كطرول فالفايسبوك ! و لقيت “أسد الافلام القصيرة” كيما كايسمي راسو ! و لي الفيديوات ديالو بالرغم من الامكانيات البسيطة راها كاضرب ربعة ثلاتة جوج د المليون دليڤي ! ولد الشرقي بصح نجم من نجوم اليوتوب ! مخدم معاه ممثلين ! ولاد الدرب ! و كايصايب افلام بسيناريوات رديئة و معاون بكلبة وسطح و بانيو مثقوب ولكن با مال عليها بالمقارنة مع شنو كانشوفو فالتلفزة و الافلام المغربية !
هاد الظاهرة ديال الافلام القصيرة راه خاصها شي وقفة الصراحة حيت مايمكنش عدد الفيديوات ديال الافلام القصيرة لي محطوطين فاليوتوب ديال قاصرين و شباب مغاربة ! ماكاين غا كتب شي قصة و نوض صورها ببورطابل و لوح ! و بنادم كايتفرج و المشاهدات طالعة و فلوس الادسنس داخلة ! واش بصح حب التمثيل ؟ واش كاين شي ابداع و لا غي رغبة فالشهرة عند الدراري ديال هاد الجيل ؟
لي معروف هوا انه اليوم الولوج للشهرة و النجومية مابقاش كايطلب الامكانيات و المعارف فحال شحال هادي ! و سير شوف شي حد يدوزك فالتلفزة و سول فلان واش كايعرف فلان يوصي عليك فلان و عطي الفلوس هنا و بوس اليدين لهيه ! اليوم اي واحد كايهز التيليفون و يدير لايڤ و يبدا ” شكرا ليكم حبابي ! شكرا ليفان ديالي لي متابعيني” الشهرة ولات فمتناول الجميع بفضل الانترنيت ووسائل التواصل الاجتماعي ! و التعامل مع الفن ولا بمنطق مقاولاتي ! و هادشي لي بين عليه ولد الشرقي !
عندك مشروع فني ؟ بلا ماتبقا تبكي و تشكي و تسعى الدعم ديال الدولة ! فينونصي المشروع ديالك راسك فحال اي مقاولة كاتفينونصي راسها و عرضو على الجمهور عبر التلفزة و لا السينيما و لا اليوتوب و الجمهور غايحكم ! كان عمل مزيان راه غاتربح منو ! كان عمل مقودة عليه راه كايتردم كيما كايتردمو گاع الاعمال الفنية الفقيرة من ناحية الابداع!
حاجة مزيانة هاد الحركية لي كاينة فالافلام القصيرة و لي كانشوف انه بشوية ديال التأطير تقدر تمشي بعيد حيت الارادة كاينة و الدراري غا بموطور و دار فالسكن الاقتصادي مطلعين اعمال كاضرب ملايين المشاهدات ! الطامة الكبرى انه فاش كاتفرج ماكاتحسش بالفرق بين دوك الافلام القصيرة دولد الشرقي مثلا و افلام مغربية اخرى ديال مخرجين مغاربة باش يصايبوها سعاو دعم الدولة و بكاو و شكاو فالمنابر الاعلامية ! ايوا لاكان نفس مستوى الرداءة و البساطة ؟! اللهم نتفرج فالرداءة فابور بلا مانحس بلي مخلصاها من فلوس الضرائب ديالي !