كود كازا//

فلقاء مع تلاميذ خلال زيارتو لمارسيليا، نهار 2 شتنبر، كشف الرئيس الفرنسي، إيمانويل ماكرون، على الصالير ديالو بشكل عفوي، من بعد ما سولاتو تلميذة عليه، وتبين أن الخلصة ديالو أقل من الرؤساء الأوروبيين.

السؤال اللي طرحاتو التلميذة بالقول: “شحال كتشد؟” خلا الاطفال لخرين يضحكو، لكن هذشي ماربكش رىيس الدولة اللي صرح ان صاليرو هو 13500 أورو، وكتبقاليه منو 8500 أورو من بعد اقتطاع الجبايات الضريبية.

???? "Combien vous gagnez d'argent ?"

Emmanuel Macron évoque son salaire devant des élèves d'une école à Marseille pic.twitter.com/DCUTuHDGHN

— BFMTV (@BFMTV) September 2, 2021

وهذ الرقم اللي عطى ماكرون شفاف وقريب للواقع، بحيث، حسب موقع “Ouest-France “، كيشد الرئيس 15200 أورو شهريا، وسنويا عندو 182 ألف و400 أورو، بصافي 160 ألف أورو فالعام.

وقال الموقع الفرنسي أن ماكرون بالمقارنة مع رؤساء أوروبا جا فاللخر ديال القائمة، وكيتقاضى صالير كيعادل الدخل القومي الإجمالي للفرد ب5 مرات فقط، وجا فالليست مع رئيس الوزراء البريطاني بوريس جونسون ورئيس جنوب إفريقيا سيريل رامفوسا، لكن هذ الأخير كيتخلص 36 مرة كثر من الدخل القومي الإجمالي فبلادو.

وهذ الجيست اللي دار ماكرون، وهو رئيس دولة عظمى، من سابع المستحيلات نشوفو بحالو عند العثماني رئيس الحكومة المغربية أو شي وزير أو مسؤول كبير عندو معاش مطرطق، بلا مانهضرو على الريع والامتيازات اللي وصلاتهم حد التخمة، لكن فالمقابل نهار كتسول شي حد منهم كيبدى يفيبري ويتهرب من الجواب بحال تاتا.

السؤال اللي كيطرح راسو هو واش المسؤولين المغاربة كانو يعطيو نفس الجواب، كون سولهم شي حد على صاليرهم؟ وواش كانو بكل شفافية يقولو شحال كيشدو؟

https://www.ouest-france.fr/politique/emmanuel-macron/le-salaire-d-emmanuel-macron-est-il-plus-eleve-que-celui-des-autres-chefs-d-etat-d36f48ea-0ca8-11ec-8f66-1caeab7b63b1