كود هناء ابو علي ////
من فترة ولات موضة فالفيدوات هي تسب رئيس الدولة محمد السادس. ماشي تنتاقد حكمو ولا تكون كاع ضد الملكية ومع نظام جمهوري اللا. كاين غير السمطة للتحت كيف قال الصحافي رضوان الرمضاني. من حق مغني يقول عاش الشعب ولكن ماشي من حقو يسب رئيس الدولة بطريقة حقيرة بزاف. فاسبانيا ناض الممثل المعروف خابيير بارديم فمؤتمر المناخ بمدريد قال على عمدة المدينة المايدا “غبي” ناضو ليه فالاعلام فالنقاشات السياسية. شكون انت تقول غبي على منتخب. سحب هاد السبة واعتاذر. وقال غير “غبي” ماشي المعيور اللي قالو ولد الكرية ف”عاش الشعب” ولا “مول الكاسكيطة” ولا “مول الحانوت” ولا للي فسيطار تطوان.
علي ذكر الراب ناض رابور فدولة اسبانيا الديموقراطية وسب ملك لبلاد اللي كيسود ولا يحكم. حكمو عليه بالحبس. كاين سيادة القانون وكاين نقاش ما يسمحش للنقد يوصل لمرحلة التجريح والسبان الخايب والمعيور تحت السمطة.
حنا رئيس الدولة عندو اختصاصات واضحة فدستور صوتو عليه لمغاربة كيتعاير وباش ناض عزيز اخنوش رئيس التجمع الوطني للاحرار فميلانو السبت اللي فات وقال ما معناه خاصهم التربية وقالها بالجمع يعني الحزب والنقابة. يعني نحن المغاربة. ماشي هو كشخص٬ ناضو ليه. هادوك اللي ناضو ليه ورجعوه سبب كاع مشاكل المغرب ودازو لتجارتو وفاتو الحزب لهيه٬ عارفين القصد من لكلام. عارفين باللي المعني بيهم ماشي لمغاربة ولكن هادوك اللي كيسبو الملك واخا هو وظف المؤسسات.
كيفاش تحول النقاش؟ هنا دخلو خصومو السياسيين من العدالة والتنمية حتى العدل والاحسان ودوزو على شي اتحاديين محسوبين على لشكر ويتامى الياس العماري. ديرو دورة فالفايس ولا غيرو غاديين تشوفو شكون نشيط فهاد الحملة اللي وجدوها بسوء نية.
سب الملك خاص يكون للسياسي فيه موقف. بنكيران عبر على تخوفو فاخر خروج ليه على ما يقع. سبق ليه هدر على هاد الموضوع. ولكن دابا ما عندوش حزب ما عندوش مؤسسة. حزبو دار بيان للامانة العامة عام ما واضحش. احزاب اخرى دارت نفس الحاجة. كاين شي حاجة ما مفهوماش.
هيئات ومؤسسات وشخصيات ضربات الطم او ناضت كتزايد بشعبوية.
دابا واش اللي كيسب الملك بهاديك الطريقة ما محتاجش يعاودو ليه الترابي؟ نسولو هادو اللي ناضو لاخنوش. ايلى قلتي عاش الشعب راك مواطن صالح ولا قلتي غير ذلك يبداو ينهشو فيك ويطلقو عليك لكذوب
