يونس أفطيط – كود///

غرفة جرائم المالية فإستئنافية فاس، زدحات يوم أمس الثلاثاء واحد السيد بغا يدير فيها قافز وياكل فلوس ماشي فلوسو، وحكمات عليه بالحبس وإعادة الاموال والغرامة من الفوق.

تفاصيل القضية حسب ما علمت « كود »، أن السيد وقع واحد الخطأ ودخلات ليه لحسابو البنكي 623608.69  درهم ما يعادل أزيد من 62 مليون سنتيم، وهو واخا تاصلو بيه وقالو ليه خطأ مابغاش يرد لفلوس وبدا كيخسر فيهم، هادشي لي خلا إدارة البريد بنك ترفع عليه دعوى وتصيفطو للحبس.

الهيئة حكمات على المتهم بإرجاع المبلغ كاملا غير منقوص، ويزيد فوقهوم 60 مليون سنتيم أخرى كتعويض للبنكة، ومن فوق هادشي عام دالحبس، والاجبار في الادنى يلا ماخلصش البنكة.