كود ياوندي///
المغاربة على اعصابهم فالكاميرون، ماشي غير المغاربة كلشي الدول المشاركة، عدوهم ما كيبانش. كورونا فكاع المتحورات اللي فيه.
المنتخب المغربي اللي ساكن فاوطيل “مون فيبي” بياوندي واخا حاضي وراد البال دخلاتو كورونا وفيه حالات دابا وفق مصادر طبية من ياوندي لـ”كود”.
لكن اللعاب منير الحدادي عاش وضعية خاصة، السيد طلع فالتيست الاول بوزيتيف وفق ما علمته “كود”، قبل ما يعاودو ليه التحليلة ويتاكدو باللي “نيگاتيف” من فيروس كورونا.
هاد الخبار طلع شوية المورال للاسود، حيت هنا گاع المنتخبات كتعاني من ارتفاع الحالات.
الندوة اللي غادي يديرها المدرب وحيد حاليلوزيتش بعد اقل من ساعة فقاعة الندوات بملعب احمدو احيدجو غادية توضح عدد الاصابات بكوفيد19 عند اسود الاطلس.
