طفات على الساحة مؤخرا شي أخبار كتقول آن رونار خاصو يمشي من المنتخب ولا رونار غيستاقل. طبعا هيا كتبقا شائعات اللي ممكن تخرج على مسار المنتخب اللي بين آن عنة، بوادر منتخب قوي يقدر يتآهل لكآس العالم ويزيد يدير نتائج احسن:

1 / رونار مدرب قوي ذهنيا

بزاف ديال الناس كانو كيقولو آن الغياب ديال خمس لاعبين أساسيين غادي يقصي المنتخب من الدور الأول فكأس افريقيا الأخيرة٬ على العكس محسيناش بالفرق ديال الغيابات. هادشي راجع لجو الثقة والتنافسية اللي دارو رونار٬ والثقة بالامكانيات اللي عندك ومخلاش الهزيمة ديال المقابلة اللولةتأثر على المنتخب من آي ناحية بالعكس رجع آقوى. هاة الثقة وعقلية الفوز كان افتقدها المنتخب منذ سنوات.

2/ العلاقة مع المحترفين

على الرغم من حادث زياش والخلاف بين الطرفين الا أن رونار العلاقة ديالوبالمحترفين والتوفيق ما بينهم وبين المحليين كان ديما مزيانة. هاد العلاقة توجاتبالالتحاق ديال بوفال بالمنتخب من بعد ما رفض فأكثر من مناسبة الالتحاق فعهد الزاكي٬ ،بلا شك روناد باقي عندو بزاف ديال المواهب اللي غيجيبللمنتخب وبداها بأشرف حكيمي لاعب ريال مدريد.

3/ كيعرف الكوت ديفوار مزيان

كتسنانا مقابلة حاسمة ضد الكوت ديفواد فاقصائيات كآس العالم٫ المنتخب اللي آخيرا فكينا العقدة ديالو مؤخرا٬ سبق لرونار كان المدرب ديالو قبل سنتين٬ وعارف كيفاش يربحو ويحقق نتيجة إيجابية فالاياب الحاسم فأبيدجان.

4/ الاستقرار

من الضروري آننا نعطيو لرونار الوقت الكافي باش يكمل المشروع ديالو ويحقق الأهداف ديالو٬ عانينا فالماضي من التغيير المستمر ديال المدربين ولي قضا على أي أمل ديالنا فالمنافسة. المطلوب اليوم منح الوقت الكافي لرونار أنه يقاد المنتخب اللي بغا٬ ويدبر التشكيلة اللي عندو٬ نحاسبوه على النتائج ماشي الاختيارات.

5/ حس تكتيكي عالي

رونار بين خلال المدة الماضية آنه كيعرف يتعامل معا كل مقابلة بالخصوصية ديالها٬ ويبدل الخطة وسط اللعب فأكثر من مناسبة٬ مرونة تكتيكية عالية خصوصا فمقابلو الكوت ديفوار اللي سيرها كيفما بغا. هاد الحس العالي مهم٬ لآنه فحال الغيابات كيبقا الفكر ديال المدرب هوا الحاسم واللي كيرجح الكفة.

6/ تعامل ذكي معا الاعلام

على الرغم من الحملة ديال الانتقادات الواسعة اللي تشنات عليه رونار قدر يتعامل بشكل احترافي معا الاعلام. ما نساقش للهجمات وخلا النتائج هيا اللي تكلم عليه٬ كما أنه تدخل فالوقت الحاسم باش يحمي اللعابة ديالو من الضغط و دافع بشدة على الاختيارات ديالو بشكل محترم وحازم فنفس الوقت.