كود الرباط////
كاين شوية العبث فشي تعيينات المجلس الوزاري اللي دارت البارح فالعيون. دابا كنتسناو اللائحة النهائية ديال السفراء والولاة والعمال واخا يالله بدات كتخرج ولكن نشوفو مؤسسة استراتيجية بحال الخطوط الملكية المغربية. جابو ليها ادريس بنهيمة وهي ميتة وكتحتضر. بعد سنوات رجع فيها الحياة نقدها من لافييت. طبعا صحاب المصالح كلهم سبوه وعيروه وهاجموه ولكن بقى غادي فالاتجاه اللي اختارو وفاخر العام جاب عقد شراكات استراتيجية مع عملاق الطيران “القطرية”. السيد خدام مزيان. فاخر لقاء معه قال “هاد الوزير في اشارة الى عزيز الرباح اكثر واحد ساندني وعاوني”. اي كان تفاهم كبير بيناتهم. ها العبث الاول يستحيل وزير النقل يغير بنهيمة فهاد الوقت وهو عارف مزيان علاش. اذن بيان الديوان الملكي اللي كان ان اسم عدو جاء باقتراح من وزير التجهيز ما شاداش. كالو لو ليه دير دار وصافي.
كاينة فضيحة الكلب اللي كانت “كود” اول من تطرق اليها. ولكن راه بنهيمة واللي معاه خدمو باش ما ضررش صورة الملكية. حقاش اولى الاخبار تحدثت عن اميرة صاحبة الكلبة. يعني ان هناك من كان ينوي ان يأخد الملف حجما اخر. فريق بنهيمة تقلق وبعد كل شبهة على العائلة الملكية. الخطا خايب ولكن ماشي تحيد واحد فحجم بنهيمة نزيه ماشي شفار وكيخدم
العبث الاخر هو تغيير بنهيمة بواحد بحال عدو. راه ما فيدوش هاد السيد. بدا حياتو مع كولا كولا ومن بعد داز لميديتل وفيهم كان فاشل ما فيدوش اعباد الله. جابو ياسر الزناكي اللي كيحميه ودخلو للمكتب الوطني للسياحة وعاونو باش يخدم وباش جا لحسن حداد وزير للقطاع جرى عليه. دابا واش ماشي عبث وزير جرى علي واحد حقاش ما فيدوش وجابو وزير اخر لمنصب كبير كبير.
عدو باش جراو عليه مشى عند زنيبر مول الشراب والفواكه وبقى خدام حتى جاه هاد المنصب. اعباد الله احترمو المناصب واش كاين شي واحد فالعالم يعوض بنهيمة بعدو كون جابو شكيب بنموسى مفهومة واحد بحال مصطفى بكوري معقولة واحد بحال عدو حشومة عليكم.
