هاجر متوكيل كود ////
باناشي د الأحاسيس بالحامض ، الدموع و الخنونة و التنواح .
_ توحشتك أبنيتي و هادي أحسن مفاجأة فحياتي
ناضت اختي للكوزينة تصاوب أتاي و بقيت حدا الواليدة كنتعاودو ، بغات تعرف بالتفصيل شنو عشت فتركيا و بطبيعة الحال محرمتهاش من هذ المتعة و عاودت ليها اللي قدرت عليه .
جات الصينية ، أتاي و الحلوة النمطية د المغاربة الفقاص ، فحالا حنا ناقصين فقايص ، حطاتها و هي تقولي
_ واش بصح تزوجتي بيها .
_ آه اختي كنبغيها و مزوجين ، و غانديرو بنيتة أنسميوها صوفيا .
قلبات عينيها و باستهزاء قالت
_ هههه ، عيش نهار تسمع خبار .
شافت فيها الواليدة و حسات بي كعيت و ممكن نقربلها مع اختي فأي لحظة ، و مايعاودوش يشوفو وجهي ، و هي تدخل من أجل تقليص الأضرار .
_ ماشي مهم معامن المهم هو تلقى راحتها و تكون فرحانة .
اختي :
_ لالياتك ضبرو ع الخليجيين و طلعو العمارات و انت تابعة لي لحيس لبنات
شيرات الواليدة بقرعة د الما عليها
_ خرجي علي خليني ندوي مع اختك .
ماجاتش الواليدة فصفي غير هكاك ، تقاتلت سنين باش نفرض عليها راسي و نهار خرجت من الخزانة و ماعجبهاش الحال ، هزيت شاكوشي و شدِّيت أول طيارة و فرضت عليها تخدم غريزة الأمومة و ماديهاش كلام الناس
_ صيفطتك بشعرك رجعتيلي قرعة .
_ وا الواليدة راه ستايل هذا ، و الحوب صعيب و المدام كيقنطها الشعر طويل .
_ وا الموهيم رآك فالمغرب دابا جمعي راسك و زيري السمطة و بعدي من المشاكيل .
_واخا أماما ، أنا أصلا جيت غي نشوفك ماناقصني تبرزيط
_لايرضي عليك أبنتي ، وشخبار حامد مسكين لاباس عليه .
زيراتني فهذ اللقطة مقديتش نجيها للصراحة و نقوليها راني قودت السوايع معه و قطعنا الهضرة .
حامد صديق ديالي من أول نهار حطيت رجلي فتركيا ، سوري من الحسكة ، إكس مجاهد فصفوف الجيش الحر و صاحبي الأنتيم . حامد بعدما علق من الدواعش و نظام الأسد و البيكيكي اللي بتلاتة باغيين راسو ، جا لتركيا حارگ و بدا حياتو من تحت الصفر ، و دار مراجعات فكرية عميقة ، حسن اللحية و ولا يلبس الموضة و كيتعامل مع ناس من مختلف الإيديولوجيات و الإنتماءات .
حامد خدمت معه فنفس الشركة و تقاسمنا نفس الدار و خرجنا و نشطنا حتى لهنا كلشي مزيان ، تالواحد السبت عرضت عليه للبار .
جا السرباي باش يأخذ لاكومونض و بقى كيضحك معايا ، حامد كعا ماشي حيث غار من السرباي اللي زوين و قشابتو واسعة و لكن حيث مثلي . قلب وجهو و خنزر فيه و بدا كيحتقرو معجبنيش الحال و ميمكنش يكون عشيري هوموفوب ، تفرگعت عليه و سمعتو خل ودنيه ، مناقشنيش هز جاكيتطو و مشى ، بلوكا نمرتي و من ديك الليلة ماعاودت سمعت عليه شي خبار .
باش نتفادى نشرح هدشي للواليدة ، قلت ليها لابأس عليه و كيسلم عليك ، و صيفط لك كادو تانحل الباليزات و نجيبو ليك .
دزنا من هادشي للهضرة على عمامي باللي كيشوفوني فالفيسبوك و ماعاجبهمش الحال ، و فخاطري كنقول و من بعد شنو كيعطيوني ؟
ساليناها فالورث و شحال ممكن تعطيني إذا تكمشت و بقيت حداها فالمغرب . الصراحة الإغراء كان لايقاوم و لكن حريتي فوق كلشي .
_واخا أماما نتشاور مع هدى و نرد عليك .
_جيبيها نهار الجمعة نديرو شي قصعة و ندويو.
خرجت من الدار تالفة كنت جاية على عشريام ممكن تصدق مؤبد . شنو أتقول هدى فهذشي و كيفاش ممكن نحافضو على علاقتنا إلا بقينا فالمغرب و شنو هوما المخاطر ؟
طلعت للطاكسي قلت ليه باب الجديد صدق دايني لباب الديوانة .
_آلشريف هذا رَآه الملاح
_سمحي لي أختي راني ماشي ولد الرباط
_ گاع ماشي رباطيين ، كون كنت رباطية كوراني ساكنة فحي الرياض و سايگة الپورش ماشي شادة طاكسي ، راحنا عا محسوبين ع العاصمة ، اللي عارفين قوالبها را قاسمينها بيناتهم …
يتبع
