نوفل الشعرة- كود

—

اللجوء هو سلسلة طويلة من الاجراءات البيروقراطية  للي كتمر ب بطئ شديد.. المعدل ف بلجيكا كان ف الايام للي دفعت انا ..انك اذا قدمتي اللجوء اليوم غادي تنتظر الجواب يجيك بين العام و العام و نص..القانون ..باش ما تمشيش تتشكا عليهم فحال للي كانو كيعملو العراقيين للي معايا ..كيقول ان الحد الاقصى ديال الانتظار هو اربع سنوات. و رغم ذلك غادي نتلاقا فيما بعد ب سيء الذكر ابو وديع الفلسطيني للي كان عايش ف السونتر ديال اللاجئين في شارلوا منذ 2011 بدون ما يتوصل بجواب نهائي .. فالاول عليك انك تقدم طلب ..و لما يعطوك موعد ..للي غالبا كيكون بين الاسبوعين و الشهر ..كتجي باش تعمل البصمات و يصوروك و يقيدو معلوماتك..اذا مشات الامور بخير كتكون رجعتي رسميا : طالب لجوء معترف به و كيعطيواك ورقة اسمها “الانيكس26” فيها موعد اخر.. كتعطيك حق الاقامة القانونية ف بلجيكا تدور فيها و تمشي فين بغيتي ما دام باقي ما جاك رد سلبي..هاد الانيكس كتعطيك حق انك تقاد بطاقة اقامة تجدد كل ثلاث اشهر للي كتسمح لك انك تعمل في الاراضي البلجيكية..و كتعطيك ايضا حق انك تمشي لمركز طالبي لجوء اذا ما عندكش فين تبات حتى يحين موعد المقابلة اللي مكتوب فالانيكس .. للي كتكون ف الغالب بعد شهر ..فيها تعاود قصتك علاش دفعتي اللجوء و تعطي جميع الاوراق للي عندك -اذا عندك-  و تجاوب على الاسئلة للي كيطرحها عليك المحقق..المقابلة كتمر فالمعدل ف ما بين الساعتين و الاربع ساعات .. في حين ان المقابلة الثانية للي كتكون حاسمة و للي كتتعطل لانهم كيكونو قراو ملفك و وجدو الاسئلة و غادي يقارنو اجوبتك ديال دابا باجوبتك السابقة فالمقابلة الاولى ..كتفوت احيانا الست ساعات و اذا كنت سيء الحظ و ما اقتنعش المحقق يمكن يقول لك باش ترجع من بعد يكمل معاك ف مقابلة ثالتة..اما انا ف عملت اربعة.

فقت, ليست دغيا و جاوبت على المساجات د الواتساب ديال الليل للي جبرت  و خرجت خفيف..نورين ما بقاتش كاينة بالنسبة لي ف خليت تا تلفوني فالدار ..محمد فاق ملي كنت كنلبس لكن ما بغاش يوصلني ف قلت نمشي على رجلي ف بروكسيل الشبه الفارغة..لكن بدلا عن ذلك نص الطريق مشيتو ف نقاش بيزنطي حول اضرار الماريوانا مع رضوان للي جبرتو كان مقصر ديك الليلة فالقهوة-بار للي حدانا بعد ما خلصو اخيرا الباطرون ديالو رافاييل.. كان مفوت  و سعيد على غير العادة حيت قال لي فالاخر بعد ما شاف راسو مشا بزاف و اننا مامشينش لدارو بل لكوميساريا ديال اللاجئين” وداعا ا خاي نوفل..عيط لي ملي توصل” ..ابتسمت لو و حركت راسي و كملت طريقي و  وصلت بكري.. لكن رغم ذلك جبرت راسي واقف اللور فصف لانهائي وراء جميع الجنسيات للي ممكن الواحد يتلاقاها فمكان واحد: افغان و عرب و افارقة و روس و اتراك ..كنسمع خليط عجيب ديال اللهجات للي جمعها القدر هنا ..و حاس براسي عايش ف باب الحارة مع مراد علمدار و مرة مرة كيلتفت ليا الشاه مسعود يحقق فيا فيما ورائي كنسمع الحشد الشعبي كيدابز مع انصار صدام..لا حيلة لدي حيت جيت وراء عملاقة المافيا الروسية للي دازو صحة في صمت مريب من شبيه معمر القذافي للي كان قبل كيحيح على الناس و كيبين زعامتو ف نفس الوقت للفتاة الكردية .. الانثى الوحيدة للي كتتوفر على شوية د القدر من جمال نجاة عتابو..كان كيقول لنا في خليط بين الحركات و الانجليزية و الفصحى انه لازم نلتزمو بالنظام لان هادي ماشي بلادنا بل بلد القانون و النظام بلجيكا..كينطق كلمة بلجيكا بالانجيلزية و بحب  حيت حنا اصلا كنا محاطين بالبوليس البلجيكي ازرق الجاكيتات للي كيشوفونا حشرات عملاقة و للي رغم انه ظل ماشي جاي حدانا ما كانش عندو حق انه يعتقلني ..كنت واقف مغطى بالكامل بالثلج و البرد  فالخمسة د الصباح ديال اخر يوم ف السنة ف 2015..جيت قبل ملي خديت ورقة الموعد ف عرفت انه هنا فحال الكوميسارية فالمغرب ملي كتمشي تقاد لاكارط ناسيونال حتى لو جيتي ف 12 د الليل ف غادي تجبر ناس سابقينك ..حيت تا هنا كاين ناس كتبات قدام كوميسارية اللاجئين باش توصل للباب هي اللولة و تا هنا كاين ناس اخرى نافذة كتجي هي الاخيرة و كتدخل مباشرة..حيت عندها المعرفة.

فالثمانية و نص فتحو الباب, و بعد شد وجذب من كولشي للي باغي يدخل دغيا ..عملت فيها مغربي بني مكادي و دافعت على بلاصتي تا دخلت اخيرا..اصلا انا عمري حسيت براسي مغربي حتى جيت ل بلجيكا .. بعد ما فتشوني فالباب و تاكدو اني عندي موعد ديك النهار و اني كنشبه شوية لتصويرتي وراوني كما كيوريو لمعاق ذهني فين خسني نمشي .. اتبعت التعليمات و جبرت راسي جالس ف قاعة كبيرة ديال الانتظار جنب ام جنوب-افريقية كتشوف فيا بحقد هي و طفلها الرضيع ..عيطو على اسمي بعد ساعة تقريبا و خداو لي صورة و سجلو بصماتي و معلوماتي الشخصية..ثم قالو لي نرجع نستنا باش يعيطو عليا مرة اخرى باش ناخذ “الانيكس 26”..رجعت لبلاصتي و بقيت كنستنا ..ساعة ..جوج ..و ثلاثة ..تا اكتشفت انهم خلاوني انا اخر واحد..بطبيعتي ما كنملش من اني نبقا جالس ف بلاصة وحدة و نقدر نبقا بلا ما نتحرك ساعات ساهي بدون ما نحس ب تا حاجة ..انا كنمل من الهدرة مع الناس لكن ما كنملش من الهدرة مع راسي..يمكن حيت كاين بزاف د الناس ف دماغي نقدر نتخيلهم و نهدر معاهم ..و يمكن لاني غي حيت حمق  معقد و خسني طبيب نفسي كيفما كانو كيقولو صحابي بدون اي يدروا اني فعلا كنشوف طبيب نفسي..مع مرور الساعات بداو كيعيطو على واحد مور واحد ..كيجي واحد كينادي اسم ف كينوض المنادى عليه و كيتبعو مغادرا القاعة للابد ..كنت عامل السماعات ف ودني و جالس ..ما عنديش اصلا التلفون عاملهم غي باش ما يهدرونيش الناس و باش ما نجاويش على اسئلتهم للي هي غالبا “انتا مغربي؟” و  “ليش يطلب مغربي اللجوء” .. ملي انتبهت جبرت ان القاعة بدات كتخوا ..و ملي جات الاربعة د العشية و راها الخمسة و بقيت بوحدي بديت كنفكر ف انهم خلاوني بوحدي مع البوليس الواقف بغرضي غي باش يشدوني  و يصردوني للمغرب..خافت و ندمت علاش خليت تلفوني فالدار ..على الاقل كنت نكتب ستاتو ..و الدراري يعملو هاشتاك #اطلقو_سراح_نوفل_الشعرة.. شكون غادي يناضل من اجلي دابا و انا بلا تلفون..  تا جا واحد السيد و قال لي اتبعني ..شهدت و نوضت ..و بقيت وراه ماشي طالع فالدروج و كنفكر فنفس الوقت منين نهرب..تا دخلني ل واحد المكتب فيه جوج سيدات جالسين و باينين كيستناوني ..مشا هو و خلاني معاهم ..و قبل ما نقولهم ” انا بريء” قالت لي اللي غادي تطلع “مترجمة” بفرنسية بلكنة مغربية انها غادي تترجم بيني و بين المحققة لانه عندي دابا مقابلة ..قلت لها ماشي المفروض ان المقابلة تكون بعد شهر ؟ قالت لي اه لكن فالحالات المشكوك فيها فحال ديال المغاربة يقدرو يعملوها لك دابا ..

ف دوزت المقابلة..

(يتبع)

صفحة الكاتب على الفيسبوك: نوفل الشعرة

————————————————————–

​الحلقات السابقة:

– ( الحلقة الاولى         : http://bit.ly/2s3GmGK  )

– ( الحلقة الثانية          : http://bit.ly/2rAO2mR  )

– ( الحلقة الثالتة          : http://bit.ly/2rXOVp7   )

– ( الحلقة الرابعة          : http://bit.ly/2sERrxk    )

– ( الحلقة الخامسة      : http://bit.ly/2rVT9xW  )

– ( الحلقة السادسة     : http://bit.ly/2skjpll      )

– ( الحلقة السابعة       : http://bit.ly/2rdle40    )

– ( الحلقة الثامنة         : https://goo.gl/Xo4Vox )

– (  الحلقة التاسعة      : http://bit.ly/2scqZvW  )

– (  الحلقة العاشرة      : http://bit.ly/2s5mRPP  )