محمد سقراط كود ////

للأسف فالمواجهة ديال موالين الطاكسيات وشركة أوبر وكريم ، الجماهير الشعبية وقفات ضد موالين الطاكسيات وتقريبا بالإجماع ، نظرا لسنوات ديال المعاملة المزفتة والقزادر المخرشين ، والشيافر غير المحترمين ( ماشي كولشي طبعا)، ولكن كاين لي تقريبا كيخرج يكريسي بطاكسي، إييه مكيجبدش على الكليان ساطورة ويحيدليه فلوسو ، ولكن بمجرد أنه يفرض عليك ثمن معين ويبدى يتشرط عليك فين يديك فراه كريساج هاداك ، بالإظافة الى أنك فالعديد من الأحيان كتركب مع طاكسي بحوايج النعاس ، كرام ديال المهنية مكاين عند البعض، ولكن طبعا هادو كيبقاو حالات ومكيمشيوش على كولشي.

الجشع هو لي كيخلي مول الطاكسي يدير هاديك الحالة ، الجشع لي فيك وفيا وفلخريين ولي هو ميزة انسانية ، وحتى ملي كيدوي شيفور الطاكسي على المصاريف ديالو وشحال كيحط لمول الطاكسي ولمول لكريمة ، فراه حقيقة خاصو يشفر الى بغا يطلع النهار ، بينما واحد عندو كريمة جاتو هدية مجبد فالدار ونهارو داخل ، وهنا كنوصلو للموشكيل الحقيقي ، هو راه خاص يتهيكل قطاع الطاكسيات ويولي قادر على المنافسة ، وميبقاش قطاع عايش بالريع ، بينما الشوافرية كيحوفرو النهار كامل على واحد ماخدم ماعرق فيها غي سمر فشي فيروج حتى جاب الله التيسير ، أنا بالنسبة ليا كيجيني الموشكيل هو هذا ، هو أن الطاكسي واكلين فيها عرام عاد كتوضل للشيفور خاصو يحوفر فيها ويعطيهم ويشيط ليه.

هنا فين كيخرج مول الطاكسي صاعر للشارع ، كيتلاقاك فباب لاكار باغي يهزك معاه صحة ويديك فين بغا هو وبشحال مابغا ، ومن غير هادو كاين حقا موالين طاكسيات لي محترمن ممهنيين وفالغالب كتلقاه خدام فطوموبيلتو متقاعد من شي خدمة عندو منها صالير مضمون وخدام فحديدة نقية ديالو وخدام على خاطرو لي جاب الله هو هاداك ولكن هادو أقلية ، حيث فالغالب الطاكسي أصبح مشكلة فالمغرب وولاو عندو شروط معقدة باش تركب، الى كنتو تلاتة غير نسا ، الى كنتي سكران وراجع للدار غتركب بثمن مضوبل ، الى كان عندك التقل غير نسى ، الى كنتي براني كتركب بنفس الثمن باش صافرتي من مدينة لمدينة ، الى جيتي تقاطع الطاكسي ماتركبش فيه غتبقى تم حيث مكاينش بديل آخر .

هاد الموشكيل ديال فقدان الزبون للثقة فمول الطاكسي خاص يحلوه موالين الطاكسيات نيت ، اراه الى كانت شي حاجة خاص يتظاهرو على ودها فراه هي هيكلة القطاع ومايبقاش فيه الريع والقزديرة كياكلو منها عشرين واحد ، أما فهاد الطريقة ديال العصابات ويبراكيو سيارات أوبر وكريم فراه كيزيدو يكرهو بنادم فيهم ، وكيزيدو يفقدو مصداقيتهم لي قليلة أصلا ، حيث مكاينش شي واحد فينا أيا كان شكله أو جنسه عمرو منوضها مع شي مول الطاكسي حتى ولا الأمر عادي وأصبح بنادم كيتجنبهم بحال الى هوما شر لابد منه ، راه خاصهم يترجلوا ويقادو قطاعهم لي كياكلوا منو الخبز أما حرب العصابات فالشوارع كتزيد تهرب الناس منهم .