سهام البارودي كود ////
النقاب تبدل و المنقبات لي عقلنا عليهم فالتسعينات ماشي هوما المنقبات لي كانشوفوهم اليوم فالفايسبوك و التويتر ! اليوم لاضربتي طليلة على الفايسبوكات ديال المنقبات غاتلقا راسك غارق وسط الألوان و الفيديوات و اللايفات و السيلفيات فحال الأغنية ديال سعاد حسني ” بامبي بامبي بامبي” ! و المنقبات لي عقلنا عليهم كايلبسو الدرابل فالكحل و كايديرو اللگات فالكحل ولاو غالبا اليوم أمهات و سماو راسهم ” أم أيمن” و “أم وليد” و غرقو وسط ليكوش و الگوامل و الحياة الجوجية مع شي بعل و خلاو بلاصتهم لواحد المنقبات fashion ! منقبات 2.0 !منقبات كايديرو لگات غوز و كايطرزو فيهم وريدة! منقبات كاتحس بيهم ماهوما منهم ماهوما منا ! كاتبغي تكلاصيهم و ماكاتقدرش!منقبات كايديرو لي لونتي فحالنا و كايتحلونو فحالنا و كايديرو الماكياج فحالنا، كاتحس بيهم كايديرو كلشي باش يبينو للعالم أنهن سعيدات ! و عايشين الحياة!
هادشي كايبين بلي الرغبة فالحياة و الرغبة فالتميز و اظهار الأنوثة و الغنج و الدلال هي الفطرة لي عند العيالات ! واخا تاكل ليها دماغها واخا تحجبها واخا تقنعها بلي هي عورة و بلي صوتها عورة و بلي وجها عورة و بلي خاصها تغطا لابغات تمشي للجنة و بلي هي فتنة خاصها تغطا باش ماتهيجش الشهوة ديال الرجال لي دايرين بيها واخا طمعها بالآخرة كاتبقا الانثى لي فيها باغا تعيش فالدنيا بعدا ! الدنيا و يحن الله من بعد ! باغا تاهي تحس براسها زوينة و محبوبة و مرغوب فيها من طرف الجنس الآخر! باغا تبين الطرف ! و تبين الزين و تبين المؤهلات لي عندها و يتزعطو فيها الدراري.
الرغبة الجنسية و الاثارة كاتبان عند المنقبات واخا سادين على راسهم وسط دوك الدرابل كوحل ! بداك شوية ديال la marge لي عندها ديال العينين و اليدين و الحركات كاتحاول تبين ليك بلي هي كاينة ! كاينة كمرأة و كاينة كأنثى وتحقق الوجود ديالها واخا بإمكانيات محدودة و رغم الحصار لي كاتمارسو على الجسد ديالها ! كاتصور سيلفي و كاتبين فيه عويناتها المكحلين بعناية و خط الآيلاينر
المطراسي بدقة ! كادير لي لونتي گاع و كايكونو فواحد اللون فاتح ! اخضر ولا عسلي باش تشوف العسل و تشهى تلحسو بطرف لسانك! كاتقاد حجبانها و كاتكثر الماسكارا فشفارها باش غي بعويناتها غي بداك شوية لي تقدر تبينو ليك، تحقق الاغراء لي كايحققوه “المتبرجات” و كاتقولك لاكان عند المتبرجات الشقة ديال الصدر باش يبانو أنا عندي الغمزة ديال العين باش نبان! غي بدوك العوينات كاتبغي تقوليك هانتا ! كي جيتك ؟ بوگوصة ياك؟ ! عويناتي زوينين !؟واخا تشوفني مغلفة وسط العباية كحلة هاهوما عویناتي يعطيوك الخبار على الزين لي عطاني الله ! و هانا عطيتك un avant goût وافهم راسك راه ملي عيني زونيني راه كلشي زوين فيا” ! كايحطو تصاورهم و هوما هازين شي اباراي canon ولا Nikon زعما راه حتى هوما عندهم هوايات فنية ! حس مرهف ! زعما واخا النقاب و واخا كايشوفو راسهم عورة و فتة راه هادشي لا يمنع باش يكونو عورات ولكن فنانات ! يكونو فتن ولكن فتن مبدعة !عندهم الهوبيز و الهوايات، و كايهزو واحد النوع ديال الصاكادوات ماشي الساك آمان عادي لي كايهزو العيالات العاديات لا لا !المنقبة 2.0كاتفضل الساكادو حيت دلالة على الحركة و السفر!عاوتاني باش تبين ليك آبوقال أنهن ماشي غي حيت مدفونات وسط الزيوف و سادين على راسهم !لا راه تاهوما كايخرجو و يسافرو و يتحركو و ينشطو ولكن ديما ” في ما يرضي الله”! و كايحطو تصاورهم و هن مائلات متمايلات دايرين قليبات بيديهم ! و كاتلقاهم عزيز عليهم يحطو شي آيات ديال القرآن مترجمة بلونگلي فالبروفايلات ديالهم باش يبانو بلي راهم بنات الوقت وكايهضرو اللغات نعام آسسسس!
و فاش كايواجهم شي حد بلي هادشي لي كايديرو فيه راه “حرام” و زينة و إثارة و بدعة بعيدة كل البعد عن المغزى من الحجاب لي الغرض منو هو تجنب اثارة الذكور، كايجاوبو كاملين بواحد الجواب حافظينو
“الاسلام هو الامتناع عن الحرام و ليس الامتناع عن الحياة”
يا سلام عليك يا شيخة و على ايمانك لي كااااايتگطر.
راه أحسن ما في الحياة حرام ! الحب حرام ! و البرونزاج حرام و الطاطواج حرام و لباس البحر حرام و الموسيقى حرام و النكت الخاسرة حرام و الاختلاط حرام و الجومبو و الصوصيسون حرام … ايوا شنو باقي ليك باش تعيشي حياتك من غير دوك الخرجات لغابة بوسكورة مع الاخوات؟ و الضحك على الفيدوات الحامضة ديال با العلوي؟ فيناهي الحياة لي كاتعيشيها و نتي عايشة كنص انسان كاضحكي نص ضحكة و تخرجي نص خرجة و تعيشي نص حياة.
وكايبقاو هاد الحالات و لي ولاو كثار هوما الطوب ديال السكيزوفرينيا لي كايعيشوها بزاف ديال المنقبات ! لي au fond باغين يعيشو الحياة ! لي باغين يطلقو الشعور و يتبحرو و يمشيو لابيسين و يخرجو تاهوما و ينشطو و يضحكو و يعجبو الرجال و يمارسو الاثارة لي كاتمارسها أي أنثى على الذكر! السكيزوفرينيا لي كاتعطي كائنات هجينة ممزقة بين اختيار الحياة و اختيار الموت.
فحال شي واحد عايش وسط سيلون و مزوق السيلون بالتصاور ديال المغنيات التيتيزات وصابغ الحيوطة بالغوز و مغطي بمانطة مازافيل و كايحاول يقاد الشهيوات باش ماياكلش ماكلة الحبس و يدخل معاه الحبس.
تاهاد البنات كايعطيوك لامبريسيو بلي كايديرو كلشي باش مايدخلش معاهم النقاب…
