حكيمة لعروسي كود ///

كتبت هذا البوست ووصلني : ( اصدقائي الاعزاء يومكم جميل ماذا تقترحون ان اكتب في مقالي الجديد الاختيار لكم)

ووصلوني تعاليق و رسائل أهمها هاد الرسالة اللي نشرت مع المقال .

في الصراحة ماعرفت مانقول ملي اطفال عندهم اقل من 12 سنة يسمعو كلام نابي في القسم ، إذن مانستغربوش ملي المراهقين ديالنا يكونو مشرملين و الشباب مجرمين يلوحو البنات من الطابق الرابع مثلما حدث مع المرحومة صابرينة اللي قطعات لينا قلبنا، فتاة في عمر الزهور مشات ضحية استهتار شبابنا اللي معولين عليهم يزيدو بهاد البلاد القدام ، المهم ماشي موضوعنا ولكن راه هادشي سلسلة شي كايدي لشي …..

كيفاش غادي نتقدمو واحنا عندنا التربية و التعليم في الحضيض ؟ كيفاش غادي يكون عندنا بلاد ديموقراطية وشبابها مافاهمينش معنى الديموقراطية و الحريات ؟؟ والدليل المشاركة الضعيفة في الانتخابات ديال الشهر الجاري .. وزيد وزيد الهضرة كثييييرة و السكات خير .

السؤال اللي خاصنا نسألو نفسنا اشنو بغينا من شباب المستقبل ؟؟ و اشنو بغينا من التعليم ؟؟

مايمكنش نطلبو من شباب قاريين 4 في الطاولة و 60 او ربعين في القسم مع استاذ كيقوليهم اللي بغا يقرا يقرا واللي مابغاش ضبر راسو انا شاد المانضة ديالي …. ويعايرهوم بالكلام النابي و اللي دار السوايع ياخد النقطة واللي ماعندو فلوس كلامو مسوس …انهم يكونوا شباب في المستوى اللي كنطمحو ليه باش هاد البلاد تزيد لقدام .

وراه ماشي كاع الناس عندهم باش يخلصو السوايع و المدارس الخاصة راه غالبية الشعب ولاد موظفين مطحونين مابين غلاء المعيشة ومتطلبات الحياة …

وهادشي كامل اللي كنشوفو في المدارس اللي ولات بحال مراكز تعذيب التلميذ بين القهر و الظلم و المحسوبية و العصا و الكلام النابي الا من رحم ربي قليل فين تلقى شي استاذ كايحسب وليدات الناس بحال ولادو و كايعلم بضمير …. فين غادين بهادشي ؟؟؟

التعليم في بلادنا مصيبة

من غياب البنية التحتية الى ضعف الوسائل البيداغوجية

والمناهج والمقررات ذات المحتوى التافه اللي ماتغيراتش مع تغير متطلبات المجتمع غير الفساد و المحسوبية والاكتضاض وغياب التحفيزات لا بالنسبة للمعلم ولا التلميذ ، خصوصا انهم كيشوفو قرا تاتعيا و جلس في الدار .. هادشي غير التربية اللي ما بقات لا في دار و لا في مدرسة …

الحل بسيط و في يد المسؤولين طبعا خاصهم يتعلمو منين يجيبو موارد للدولة لبناء مدارس … ماشي يتعلمو كيفاش يخسرو فلوس الشعب في الخوى الخاوي راه أهم استثمار هو اطفال وشباب هاد البلاد .

خاصنا نبعدو التعليم على اي استقطاب سياسي او ايديلوجي

وخاصنا نعرفو ماذا نريد من التعليم ؟؟

واي نوع من المواطن نريد ان يكون اولادنا في المستقبل؟؟ اي متشبعين بأي قيم ؟؟ ديك الساعة غادي نعرفو كيفاش نبداو الاصلاح بلا حلول ترقيعية تستنزف الثروات وتخرج لينا عطالة و ارهابيين و مشرملين …

كلامي للكبار فهما لا الكبار سنا
الله يجيب اللي يفهمنا ولا يعطيناش