كود علي الصافي العيون ///
الداعشي التكفيري مول الفوقية واسمو الحقيقي ياسين دهن٬ سبق وهدر دم الرفيقي وعصيد وصلاح الوديع ودار تدوينة باش قالو موقفهم من الورث. هاجم الدولة فنفس التدوينة وما هدر معاه حد. كيفاش؟ الداعشي تلميذ ابو الحجيم كذب وقولهم اللي ما قالوش باش يهيج عليهم الناس. دار ربط بحال اي داعشي بين مواضيع لا رابط بينها. قال باللي هاد المثقين اللي نشر صورهم باينة فتدوينتو خلاو حتجاجات جرادة والريف والمهرجانات، اللي كذب وقال باللي تنفق عليها الملايير، ومشاو لموضوع الارث.
هاد الداعشي اللي سميتو ياسين دهن عارف باللي هاد المثقفين هدرو وبزاف على كاع ديك المواضيع. جبدو حراك الريف وكانت مواقفهم شجاعة ودافعو على ناس جرادة ولكن هو باش يهيج عليهم اتباعو٬ بينهم باللي “شغلهم الشاغل مراجعة شرع الله”.
باسلوب داعشي كتب تدوينة كلها سم باش يهيج الشعب وبين ان الدولة راعية لهاد الافكار اي انو بعد ما كفرهم كفر الدولة حتى هي. كتب بوضوح باللي ساكتين حقاش “الكلب لا يعض اليد التي ترعاه” وختمها باهدار دمهم بعبارة واضحة “الله يلاقيكم مع ليوث الحق فشي زنقة ما كتخرج”.
اش دارو معاه بعد هاد الشي. والو. اش دارت النيابة العامة مع تهديد صريح للقتل منشور مع صورة لمشاركين فندوة وباينة صور عصيد ورفيقي والوريع؟ والو. بحال ايلى تشجيع لهاد الداعشي على الاستمرار فمنهجه التكفيري.
