كود احمد الطيب وهناء ابو علي ////

اعلان السلطات الهولندية اليوم الخميس باللي شدات تاجر مخدرات معروف من أصل مغربي مقيم بهولندا والبرلماني السابق وابن الحسيمة سعيد شعو٬ راه وراه مفاوضات صعيبة.

وكالة الانباء الهولندية قالت باللي هاد الشخص كان موضوع مذكرتي توقيف دوليتين أصدرهما القضاء المغربي من أجل “تكوين عصابة إجرامية” و”الاتجار الدولي في المخدرات”.

دابا كيفاش وصلنا لهاد الشي. وفق مصادر مطلعة ل”كود” فان هذا الاتفاق توقع حتى البارح مع الثلاثة الليل= الصباح=.

المغرب باش خرج بيان قال فيه باللي تم استدعاء سفير المغرب للتشاور كان اختار التصعيد بخصوص هاد القضية. حقاش قبل كانت اتصالات بين رئيسي الحكومة واخا ديالنا ما فاهم والو ولكن المفاوضات ديال بصاح كانت بين ديبلوماسية البلدين.

المغرب قال لهولندا هاداك شعو راه مهرب معروف ومطلوب للعدالة من 2010 والمغرب دار مذكرة دولية فحقو وان الرباط مدات السلطات الهولندية، منذ عدة أشهر، بمعلومات دقيقة تفيد بتورط هذا المهرب في تمويل وتقديم الدعم اللوجستي لبعض الأوساط في شمال المغرب|

وباللي الرباط كتعاون معاكم ومع الاتحاد الاوربي وخاصهم تتعاونو معانا. الديبلوماسية المغربية من خلال بيان الخارجية صعدو باش قالو “تم إبلاغ السلطات الهولندية وبوضوح بأنه يتعين اتخاذ تدابير ملموسة وعاجلة ضد هذا المهرب الذي يرتزق من الاضطرابات” واضاف “المغرب يحتفظ بحقه في استخلاص كل التبعات والآثار التي قد تفرض نفسها على مستوى العلاقات الثنائية واتخاذ الاجراءات، خاصة السياسية والدبلوماسية، الضرورية”.

وفق مصدر “كود” الهولنديين ما كانوش كينتاظرو هاد الحدة. حقاش كانوا باغيين يجرجرو شوية. هاد الشي علاش فبيان الخارجية والعدل ديالهم قالو هاداك البيان ما مفهموش وحنا باغيين نتعاونو…..

مصدر “كود” قال ان المغرب كان فرحان براسو ودافع على حقو وكان واثق من عدالة مطلبو “هاد الهولنديين باش كيطلبو التعاون وكيكون مع القضاء المغربي كيفرحو وباش بغينا نتسلمو مهرب كبير ما بغاوش. اذن التعاون اما كامل او ما يكونش” يشرح المصدر المغربي. هاد الشي زعزعهم حقاش المفاوضات بين المغرب وهولندا وصلات لمعادلة : شعو مقابل التعاون الامني والقضائي والديبلوماسي والقنصلي …..

المغرب وفق مصدر “كود” دفع بنقطة اخرى وهي “غاديين نضمو المحاكمة العادلة لشعو”؟ كيفاش سولو الهولنديين. المغاربة جاوبوهم. احترام للمساطر احترام لكافة شروط المحاكمة العادلة باش يجي هنا للمغرب. ماشي غير هاد الشي وفي اطار التعاون بين البلدين من حق شعو يجيب محامي ديالو من هولندا ومن حق السفارة المغربية في هولندا تحضر لهاد المحاكمة. هنا بداو يرطابو.

حسب مصدر “كود” بدات المفاوضات وجات لجنة للمغرب واللي وصلات لاتفاق مع المغرب فاول ساعات اليوم الخميس.
اللي عاون هو ان شعو عندو نفس التهم تقريبا اللي عندو فالمغرب زايد عليهم هناك حمل السلاح. وقضية حرية التعبير ودعوتو لانفصال جديدة يشرح مصدر “كود” “المغرب كيهدر على قضايا عندها 7 سنين. ما كانش ديك الساعة كيقول باللي انفصالي”.

اليوم القضية بيد القضاء الهولندي باش يبث فطلب المغرب تسليمه شعو. طبعا المحامي غادي يدير مرافعة باش يتطلق والقضاء غادي يحكم وفق القانون هناك.
وبعد التسليم غادي يتحاكم فالمغرب٬ وفق مصدر “كود” ومن بعد غادي يقضي الحبس ديالو فهولندا. هاد الشي من النقاط اللي جات فالاتفاق. المهم الهولنديين اللي عارفين ما كاينش الاعدام فالمغرب طيحو كواريهم وحدرو الراس ومن المتوقع يسلموه للمحاكم المغربية