سهام البارودي – كود//
شحال من واحد فينا سمع نكتة كاتبدى بقاليك هذا واحد الفقيه ؟ ! بزاف ديال المغاربة عارفين بزاف ديال النكت على الفقها مثلا هاديك ديال جوج لي مشاو لشي سبوع يقراو شي بركة و طفا الضو واحد طار على دجاجة دارها فقبّو و فاش شعل الضو واحد من صحابو عاق بيه و باش مايعيقوش بيهم الناس بدا كايقرا بالتجويد ” ماذا في قبك سااااخينووون ؟” و جاوبو لاخر ” إلى الزنقة قاسيمووون” !
شحال من نكتة سمعناها و تعاودات لينا كاتبدا ب” قاليك هذا واحد مات و مشا للجنة …” “قاليك هذا واحد مات و مشا يتحاسب…” “قاليك هذا واحد مات و مشا عند الله…” ايه حتى الله حاضر فالنكت ديالنا كيما حاضر فالنكت ديال الديانات كاملة !
المغاربة كايسخرو من كلشي ! من الفقها ! من اللحايا ! من الدّين من السياسيين من الجنس ! الاغلبية ديال النكت المضحكة د بصح كاتكون حول هاد المواضيع بالضبط و كايسميوها نكت “سانك ايطوال” ! و كايسخرو حتى من راسهم من العروبي من الشلح من الفاسي من الغني من المزلوط حيت السخرية هي هادي ماكاتعرف حتى شي طابو و حتى شي حدود ! و ولو أنها تخضع لقيود فالاعلام الرسمي إلا أنها فالواقع كاتحدى جميع القيود.