كود عن صحف صبليونية ////
نايضة فالصبليون على اختفاء كريم بوياخريشان٬ زعيم “موكرو مافيا” اللي كان تشد فعملية كبيرة هادي اشهر بماربيا. الصدمة اللي وصلات للحكومة كانت بسباب قرار القاضي اللي متبع الملف بجنوب اسبانيا متابعة هاد العنصر الخطير اللي عندو ارتباط كبير برضوان التاغي احد اشهر زعماء العصابات فهولندا وفاوربا واللي كيدوز المؤبد فسجون هاد البلد الاوربي.
دابا كاين نقاش كبير فالقضاء على تصرف هاد القاضي اللي حيد ليه الباسبور وفرض عليه يجي كل 15 يوم يجي يوقع ففوينخيرولا قبل ما يغبر نهار 15 ابريل اللي فات٬ كان موعد توقيعو فالكوميسارية.
دابا غبر. الحكومة مصدومة ووزير الداخلية مارلاسكا اكد اليوم الثلاثاء 23 ابريل 2024 فتصريح لوسائل الاعلام ديال بلادو بللي تم تعبئة كاع الوسائل باش يشدو بوياخريشان. هولندا عبرات عن استغرابها من تصرف القاضي الصبليوني وقالت باللي كانت مذكرة من بلادو لترحيلو لهولندا.
دابا حتى النيابة العامة الصبليونية انتقدات بزاف قرار القضاء. واعتبرات باللي “ما عندوش جذور شخصية ومهنية وعائلية فبلادنا” وباللي “عندو الجنسية المغربية” وباللي “امكانية هروبو لبلادو كانت قائمة” وباللي “السلطات الهولندية سبق وقدمات مذكرة باش يتحاكم عندها وكاينة هاد المذكرة الاوربية لاعتقالو” واكثر من ذلك “كاينة موافقة ايجابية” من النيابة العامة الصبليونية لتسليمووباللي متورط فقضايا كبيرة كتهم تبيض اموال مافيا المخذرات
زعيم “موكرو مافيا” تشد هادي اشهر ولكن قاضي بمحكمة بمالگا قرر يوم 22 فبراير يطلق سراحو مع ما عتابرو ضمانات باش ما يهربش. غير هو طلقو اكثر مجرم مبحوث عليه فهولندا
هاد الزعيم كان تخصص فتبييض فلوس المخذرات بانواعها. لقاو، شاري 172 عقار بقيمة 50 مليون اورو.
