انس العمري – كود//

البارح ف برنامج حواري ديال قناة فوكس الامريكية المقربة من المحافظين ومن ترامب كانو كايهضرو على تطورات الاصابات بالكورونا ثم هضرو على حالة شفاء ولي العهد البريطاني شارلز من الفيروس..

صحفية بغات تعلق وتذكر المشاهدين بهاد الحالة و قالت انه أصيب بالعدوى ملي تلاقا زعيم موروكو..اي المغرب بالانجليزية ..السيدة بغات تقول موناكو حيث بالفعل أمير موناكو مصاب بالفيروس وهو اللي نقل العدوى لولي العهد البريطاني ..

بطبيعة الحال راه الأمريكيين معروفين بجهلهم لجغرافية الدول وكايخلطو ديما موناكو ب موروكو  واغلبهم وخا قاريين ماعارفينش تا شحال من قارة كاينة ف العالم وهادشي عادي..اللي ماشي عادي هو تهافت مايسمى بالمعارضة الانترنيتية البئيسة وجمهوريات اللايف و المبتزين واللي داير الاسترزاق بالكوارث  بالتقاط الفيديو و تنشره على اوسع نطاق  وخا عارفين ان اللي وقع مجرد خطأ و زلة لسان وناشرينه على اساس ان سيدنا مصاب بالفيروس…وهدفهم هو زرع البلبلة و الفوضى ف نفوس المغاربة و لكن اللي ماعارفينش هاد الناس ان هاد الوقت ماشي ديال المؤمرات و اخفاء الاخبار وان الدول ومن بينها المغرب قدام هاد الخطر الداهم اللي كايهدد مستقبل البشرية ولات خدامة بالشفافية وماكاين ماييتخبا واي دولة تصاب ليها وزير او مسؤول او امير او رئيس دولة راه كتقولها عادي  وكايتخاذو الاحتياطات حيث ماشي عيب ولا عار ولا حشومة المرض ولا الاصابة به  بكل بساطة.

واللي بغا يدير المعارضة يديرها بالمعقول  و ف الميدان ماشي بتصيد زلات اللسان و نشر الفايك نيوز .