سهام البارودي- كود//

بزاف د الناس فالمغرب كايتجوجو غا باش يتسماو تجوجو ! دوزو الفريضة ! و نفس الأمر بالنسبة للاولاد ! بنادم كايولد و هوا ماعندو لا العقل للدراري لا الطاقة ليهم لا الخاطر لا الفلوس لا تا خصية ! كايولدو غا باش يتسماو عندها ” وليدات” فلان راه “مولا وليدات” فلانة راه “بوليداتها تبارك الله” “عندو جووووج ” “عندوووو ربعة تبارك الله” ! كايطيرو فالاولاد ! الاولاد ! الاولاد ! و السميات ” هنفساء” ” تنفساء” ” استنشام …” و تسوليه على المعنى يقوليك ” هنفساء كاتعني الغبرة لي كاتكون فوق ورق واحد الشجرة فالجنّة” زعما صافي راه ضربها للعين العورة ! السميّات حيت ساهلين يتلقاو و ماكايخلصوش عليهم الفلوس هوما الأولين كايبدعو فيهم !

و لكن بالمقابل شي تربية ! والو ! شي مقابلة والو ! شي عناية والو ! راه كون كانت تهمة الاهمال كاتطبق كورّاه بزاف د الاسر المغربية داو ليها ولادها للخيرية ! گاع دوك صحاب ” كايتزاد برزقو” و “المربّي من عند ربّي” گاع هادو غايدوزو الحبس و يتيحدو ليهم الدراري حيت مايستاهلوهمش!

كيفاش فالنصاصات د الليل كاتلقا دراري صغار مازال كايلعبو فالزنقة ؟ كيفاش شي مرات كاتكون كاتضور فشي حومة حتى كايبانو ليك شي دراري بعاد على ديك الحومة كايضورو فيها اطفال باغين يستكشفو ؟ كيفاش بنت صغير كاتمشي للحانوت بوحدها بدون مراقبة ؟

الأب طالق رجليه فشي سدّاري و لا غابر خدّام و الأم حالّة فمها فشي ڤيديو ديال روتيني اليومي ! ولاو باغين غا لي يفكهم من ولادهم داكشي علاش كايتقلقو ملي كايديرو الاساتذة الاضراب ! و لا فاش كاتوصل العطلة ! ماكرهوهاش ماتكونش غا باش تبقا المدرسة شادة ليهم ولادهم لي هوما بكرّهم ماقادينش يشدوهم حداهم ! كايوصل عليها شهر تسعود كاتلقاها كادور بجلابتها حدا المدرسة ” فوقاش غايدخلو ؟”

الأمومة و الأبوة راه تامارة و تضحية بالمال و الجهد و الوقت ، الأمهات لي كانعرف أنا راه كاتلقاها مشنتفة مسكينة الوقت لي غاتمشي فيه للكوافور كاتفضل تدير فيه شي أكيتيفيطي مع ولادها فالدار ، رسم ، تلوين، طبخ ….

الناس لي واعيين كايربّيو ولادهم بالكتوبة و بالبحث ، ها تقنية مونتيسوري ها البلا الكحل … كاتلقاهم نهار الاحد هازين شي طروتينيط و مهلوكين بالعيا و تامارة د الخدمة د الاسبوع و هاكاك مايجلسوش يترخاو حدا شي فيلم فنيتفليكس لا خارجين باش يديو بعتوت يلعب فشي غابة و لا شي جردة ! مقابلينو! كايقراو معاه ! كايهضرو معاه ! كايربّيوه ! كايأدّيو المهمة على اكمل وجه باش يصنعو ليك مواطن صالح ! انسان سوي ! خال من العقد و الامراض ! عندو مستقبل فالحياة !

ماشي ولد و طلق ! كايخرجو ليك جيوش ديال الشماكرية و الموسخين و الموسخات ! ماصالحين لالراسهم لالواليديهم لا للمجتمع !