كود كازا////

داير فيديو فيه الوزير السابق للشبيبة والرياضة محمد اوزين گالس فماربيا فمطعم ولا قهوى. بحالو بحال ناس كثار. مول الفيديو المتخلف داير بحال المطاوعة السواعدة هادوك بوليس الاخلاق ديالهم٬ تابعو. كاليك كيشرب البيرة. يشربها ما يشربها واش جداك اللي مخلصاها عليه.

ياك هو برلماني اليوم. ما عندو علاقة بتدبير حتى شي ملف عندو علاقة بالمال العام وعلاش يا شعب الحضية تابعينو.

دابا هاد المتخلفين كيتلاقاو مع الاصوليين كيكولو وعلاش مع الوزير محمد يتيم وصاحبتو المدلكة ولا فاطمة النجار وصاحبها بنحماد ناض عليهم الصداع؟ اييه هادوك خاصة فحالة النجار عادي ينوض الصداع حقاش بنات حياتها على محاربة الحب والجنس والحياة الزوينة باسم الدين. حرمات كلشي. بحالها بحال يتيم فايامو السابقة. اليوم يتيم طور راسو بزاف ومزيان عرف باللي الحوريات كاينين هنا فالحياة ماشي بالاخرة.

بالمقابل محمد اوزين ما عمرو دخل نقاش كيهم الاخلاق ولا الحياة الشخصية فالنقاش العمومي. ما عمرو. اليوم هاد شرطة الاخلاق باغية تحاصر المواطنين تتجسس عليهم. تجسسو ايلى كان فلوس ديك البيرة من المال العام ماشي من فلوسو وباراكا من الحضية