كود سبور//

باغي الفرنسي هيرفي رونار الناخب الوطني السابق للمنتخب المغربي واللي كيدرب دابا المنتخب الفرنسي النسوي، (باغي) يشارك فمونديال 2026، وهذا الشي بعدما قرر يطلق سيدات فرنسا بعد الألعاب الاولمبية الصيف الجاي “باريس 2024”.

وفتصريح له نشراتو جريدة “ليكيب الفرنسية” اليوم الخميس، كشف المدرب الفرنسي هيرفي رونار، أن الهدف ديالو بعد تجربة الكورة النسوية مع منتخب فرنسا، هو انه يكون حاضر فكاس العالم 2026، وقال: “حاط فرانسي نلعب مونديال 2026 رجال، وكنتمنى نكون فكاس العالم الثالثة ليا كمدرب باش نمثل شي بلد، وهادي هي أهدافي الشخصية”.

الفرنسي هيرفي رونار اللي فايت له درب المنتخب الوطني المغربي وقدر يحقق معه نتائج مزيانة بالمقارنة مع الفترة اللي درب فيها الأسود، ومن بينها التأهل إلى الدور الثاني من كاس افريقيا 2017 بعدما كان المنتخب المغربي كيتقصى من الدور الاول لدورات، والتأهل لمونديال 2018 بعد غياب من 1998، كيجي التصريح ديالو فوقت كيدوز منو المنتخب المغربي من مرحلة صعيبة مع الناخب الوطني وليد الركراكي، اللي اعترف بأنه عندو مشاكل تقنية تكتيكية فالمنتخب ومن بينها العقم الهجومي فالوقت اللي كتوجه له انتقادات قوية بأن عندو نجوم ديال فرق كبيرة بحال براهيم دياز والياس بنصغير وامين عدلي وسفيان رحيمي وغيرهم، ولكن ما كيعرفش يوظفهم باش يتألقو كيفما كيديرو مع الاندية ديالهم، وهنا السؤال كيتطرح واش هيرفي رونار باغي يرجع يدرب المنتخب المغربي بلاصة الركراكي وكيلمح لهادشي وكيضغط عليه ؟