عفراء علوي محمدي- كود//
لاحت هيلاري كلينتون، السياسية الامريكية ووزيرة الخارجية السابقة، اليوم الخميس، تصويرة ليها هي وراجلها رئيس ميريكان الأسبق بيل كلينتون وهي لابسة القفطان المغربي.
وقالت كلينتون، فتدوينة مرفقة مع التصويرة اللي حطات: “هذا موسم القفطان”.
وكانت لبسات كلينتون هذ القفطان فعرس اللاعب الإسرائيلي أليكس سيفاكا مع بنت المليونير المغربي مارك لازار فنيويورك، ف 2017.
وهذيك ماكانتش اول مرة تلبس فيها كلينتون القفطان، بحيث سبق ليها لبساتو فزيارة ليها للمغرب فعهد الملك الراحل الحسن الثاني.
كيف لبسات كلينتون عاوثاني القفطان مع الملك محمد السادس، خلال زيارتو لميريكان ف 2000 فعهد حكم راجلها، الشي اللي كيدل على حبها للباس التقليدي المغربي.
