كمرا مثلا گاورية عايشة فالمغرب تقدري آ مدام تجيبي خدامة 1500 درهم فالشهر طيب ليك و تصبن ليك و تسيق و تحدد الحوايج و تعيشي معاها التموليك على حقو و طريقو! نساي “لافيسيل” و “نساي لولانج” و نساي لاكويزين ! الخدامة لي مايمكنش تحلمي بيها ففرانسا لاماكنتيش لاباس عليك ديال بصح هنا تلقايها بجوج دريال و تجيب معاها تا الشيفور ديال خوها و الجارديني ديال بوها !
كگاوري راجل عايش فالمغرب عندك احتمال تلقى مرا زوينة و صغيرة لي تهلا فيك و تعيش معاها مزيان فالرباط و لا مراكش و لا العرايش اكثر من الاحتمال تلقاها فبلادك ! مايهمش واش زوين و لا خايب ! طويل و لا قصير ! صغير و لا شارف ! غادي تلقا “المرا” ! حنا العيالات عندنا فيهم نسبة كبيرة ماكايتشرطوش بزاف و الراجل عندهم ماكايعيبو الا جييو.
كگاوري عايش فالمغرب تقدر تشد لوطيل مع صاحبتك (بشرط تكون تا هي گاورية) بلا مايسولكم شي حد على لاكط د مارياج في حين لا كنتي مغربي غايگولوليك لا خويا سمح لينا ضرووووري خاصنا العقد!
تقدر تشري الشراب و تشرب الشراب فوقما بغيتي و فين مابغيتي ! كمغربي تقدر تشري الشراب و تشرب الشراب ولكن بالتخبية ماعندكش مثلا الحق تجلس فشي طيراس ديال شي بار فشي نهار مشمش و تحط حداك شي بيرة مدمعة!
كگاوري عايش فالمغرب الاحتمال باش يشفرك شي حد فالزنقة و لا يشرملك و لا يتعدى عليك ضعيف بعض الشيء بالمقارنة مع لاكنتي مغربي حيت لاتشرمل گاوري القيامة كاتنوض ! السفارة ديال بلادو كادخل ! النيويورك تايمز كايكتب ! البوليس و الجادارمية غايفليو گاع القنات باش يجبدو لي تعدى عليك! و حقك غادي يرجع ليك بالثاني و المثني ! حيت ليماااج ديال المغرب مهمو بزاف على برا ، و لكن شكون تسوق لشي ايماج لداخل؟
و نتي آمدام لا كنتي گاورية عايشة فالمغرب ! لبسي لي بغيتي ! و ديري لي بغيتي ! ! جلسي فالقهوة و شعلي گاروك ! ماغايشوفكش المغربي و يقولك عليك “قحبة” و لا يدوز و يدفل “واع ! عمرتو البلاد” حيت لابسبة صاية ! غايحتارمك ! غاتعجبيه ! غاتجيه قمة الحب و الحضارة و الجمال و غي لابتاسمتي ليه … هاداك هو النهار الكبير

لاكنتو كوبل ديال الگور فالمغرب، تقدر تشد فيد صاحبتك  و تسارا معاها فالمدينة و حدا لاكوط و جيهت عين الذياب، و حتى لابستيها غالبا غير غايشوفو فيكم الناس باستغراب و العيالات غايديرو راسهم حشمو “ويلي ويلي ويلي البوسان يا ختسي” و لكن لا كنتي مغربي شي مرات غير الشدة فيد صاحبتك تقام عليك بمضاربة مع شي قمقوم كايغوت ” وا حتشاارمونا راه معانا واليدينااا” .
لا كنتي گاوري متقاعد شارف فالمغرب ! ماغاتعيش كي الشراف المغاربة ! أغلب وقتك فشي جردة كاتعلب ضامة مع المتقاعدين فحالك ! خاشي رجليك فشي صندالة د الجلد مغبرة و فمك مردوم من السنان و كاتساين جوج فرنك ديال التقاعد  ! غاتكون متقاعد گاوري محترم! كايعيطو ليك مسيو جاك” و لا “سينيور  ميگیل”! بصحة جيدة نفسيا و جسديا، عندك تقاعد محترم كايضمن ليك عيش كريم بلا ماتمد يديك لولادك، و عندك ما يكفي من الفلوس باش تعيش مبرع فالمغرب و تشمش رجيلاتك لي فيهم الروماتيزم تحت الشميشة فشي صولاريوم فمراكش، واكل مزيان، ناعس مزيان، مسافر، مشمش، مرتاح كادوز آخر أيامك فالاستمتاع بالحياة.

هادشي علاش الحلم ديالي تانا نعيش فالمغرب
ولكن قبل منو كانحلم نولي گاورية