كود كازا//
مازالت تداعيات انهيار سقف أقسام ثانوية الخليل التأهيلية بسيدي الطيبي مستمرة. فبعد الهجمة الشرسة على رئيس الجماعة محمد المومني المنتمي للعدالة و التنمية، ناض هاذ الاخر ورمى الكرة فمعلب الاكاديمية.
الانهيار اللي وقع لبارح الجمعة فالصباح كان غادي يتسبب فكارثة كون مخرجو عمال الورش للصلاة. الاتهامات الأولى حملات المسؤولية لرئيس الجماعة حيث هو اللي كان كينسب المشروع لراسو وكيقول ان مشروع الثانوية تحقق بفعل توفير الجماعة لقطعة أرضية، وملي طاحت البناية وكلشي طالبو بالمحاسبة و التلاعب في تمرير الصفقة و الغش، خرج من روندتو.
رئيس جماعة سيدي الطيبي دار بيان على صفحتو بالفايسبوك، كيقول فيه أن الانهيار فعلا وقع، وأن صاحبة المشروع هي وزارة التربية الوطنية في شخص أكاديمية الرباط. رئيس الجماعة زاد وقال هاذ المشروع كيدخل في إطار المشروع الملكي لتنمية إقليم القنيطرة و أن الاكاديمية هيا اللي كتخلص المهندسة المكلفة ومختبر التتبع والتقنيين.
واخا هكاك مازال رئيس الجماعة نازلين عليه سكان سيدي الطيبي، ودخلو معاه فالرشوة وفحوايج أخرى، فانتظار تخرج الاكاديمية الجهوية عن صمتها، خصوصا أن الهدرة كثيرة على صفقات البنايات بمديرية القنيطرة وفمجموع مديريات أكاديمية الرباط اللي المدير ديالها دار ندوة هدر فيها مؤخرا على الحكامة والافتحاص لمشاريع وخدمات كتوصل لـ 90 مليار فالعام.
هاذ القضية غادي تفتح من جديد ملف إعفاء المدير الإقليمي السابق للقنيطرة أحمد كيكيش اللي رافع لحد الان أكثر من 33 شكاية، ضد بلمختار وبلقاسمي وأقوضاض وضرضور ومن يسميهم بعصابة باب الرواح، للقضاء على فساد صفقات و الاختلاس والتلاعب وتبديد المال العام، و اللي فضح مؤخرا تورط رئيس الحكومة فوقف بناء مؤسسة تعليمية بسلا.
