هناء ابو علي كازا ////
قصة بحال شي فيلم وقعات ل6 اطر مغربية حصلات زمن كورونا فيروس بكوناكري فغينيا. القصة بدات وفق ما عملته “كود” باش فتحات لارام خطوط للمغاربة والمقيمين فالمغرب اللي يمكن ليهم يرجعو للبلاد. هاد الاطر اللي خدامين فشركة ديال الكابلات الكهربائية فشركة مغربية كبيرة عندها مارشيات فافريقيا٬ دوزو المدة كلها فالعاصمة الغينية.
نهار الخميس 30 يونيو كانت عندهم رحلة مع “لارام” من كوناكري للدار البيضاء. وفق مصادر “كود” هادي كانت اخر رحلة. مع مشاكل تسيت “سي بي ار” فالعالم كولو ماشي غير افريقيا٬ داروه وتسناو وتعطلات النتيجة. باش خرجات النتيجة وكانت كلها سلبية عند الاطر 6 الطيارة دلارام كانت مشات.
مصدر “كود” قال انو باش يرجعو لبلادهم قررو الاقامة فاوطيل فكوناكري حتى يوم 5 يوليوز اي اليوم الاربعاء اللي كانت عندهم رحلة من كوناكري لابيدجان على الخطوط الاثيوبية ومن ابيدجان للدار البيضاء يوم غد الخميس 6 يوليوز. طبعا بقى ليهم خاصهم يعاودو التيست باش يكون وفق ما حددته الخارجية المغربية “48 ساعة” قبل الرحلة. المفاجأة وفق مصدر “كود”٬ كانت صادمة. باش عاودوه طلع فيهم كورونا فيروس ب6. كلشي ايجابي. اكتاشفو باللي جاتهم خلال اقامتهم فهاد لوطيل.
دابا خاصهم يتسناو حتي يدوزو هاد الفيروس وديك الساعة يلقاو حل باش يرجعو لبلادهم
