كود مراكش ////
هادي ما قالهاش اي مسؤول. هادي قالها واحد من لمخاخ فالبلاد واللي كيسير اهم شركة فالمغرب. مصطفى التراب الرئيس المدير العام للمجمع الشريف للفوسفاط قال السبت اللي فات بمراكش فلقاء خاص مع شباب رائع من دول كثيرة حضرته “كود” انو باللي بدا خدمتو فهاد الشركة الكبيرة كانت مكاتب دراسات وجدات دراسات مختلفة لتطوير المجمع الشريف. التراب يضيف في هاداك اللقاء “باش وصلت درت عكس اللي قالت لي مكاتب الدراسات باش نطور المجمع الشريف للفوسفاط. ما خديتش باقتراحاتهم”.
هادي راها مهمة بزاف بزاف فبلاد كثير من مسؤوليه كيضاربو باش يطبقو حرفيا نتائج مكاتب الدراسات العالمية. كلشي باغي يدير دراسة وكلشي باغي يطبقها. فقضية التراب راكم عارفين البقية. نجاح غير مسبوق لهاد المسؤول. رجعو مقاد وما بقاش المغرب غير كيبيع الفوسفاط الخام بل ولات مصانع وشركات وولينا كنتجو الاسمدة ومعاها ولات معهد مستقبلي 13/37 وجامعة محمد السادس ببنكرير.
التراب ما داهاش فالناس فهدرتهم فحاجة اخرى وهي تأسيس شركة “جيزا” مع “جاكوست الامريكية. كان هاد الشي ف2011. التراب قال فاللقاء اللي حضراتو “كود” باللي “بزاف ضحكو علينا”. دابا هاد الشركة هي اول شركة للخبرة الهندسية فافريقيا. عندها بروفيات دياولها فهندسة المناجم المفتوحة. بنات مناجم وشركات تابعة للمجمع الشريف وكتخدم فدول اخرى