عفراء علوي محمدي- كود//
كيستعد سيمون هايم سكيرا، رئيس جمعية صداقة المغرب وإسرائيل، باش يدير زيارة فإقليم الحوز بجهة مراكش، ويتلاقى مع مروان شويوخ، رئيس المجلس الإقليمي للسياحة فالإقليم، من أجل بحث سبل النهوض بالسياحة فالبلدين
الوفد اللي غيزور الإقليم غيكون مترأسو سكيرا، وغيكونو فيه باحثين فالعلاقات الدولية والشؤون الدبلوماسية، ونشطاء فميدان الحكامة والسلام بين الشعبين.
وحسب بلاغ للجمعية، حصلات عليه “كود”، فهذ الوفد غادي يتدارس مختلف الإمكانات لتسهيل ولوج السياح لوكالات الأسفار فالبلدين بجوج، وتعزيز الثقافة المغربية اليهودية فهذ التقارب الإنساني.
وكيجي هذ اللقاء، حسب البلاغ، بحكم أهمية النهوض بالقطاع السياحي فالمغرب، من بعد ازمة الجايحة اللي كلا بسبابها الدق.
وعبر سكيرا على الرغب ديالو فتوطيد العلاقات بين البلدين كثر وكثر، ومن خلال هذ الزيارة كيطمح يرجعو آلاف اليهود المغاربة لبلادهم.
