محمد سقراط-كود///

الطريقة باش كتواصل وزارة الصحة مع المغاربة مقودة عليها بزاف، كل عشية تجيبو وحدة تعرض الأرقام بلا تفاصيل بلا إستراتيجيات بلا شنو غادا تدير الوزارة من بعد شنو المخططات والقرارات مكاين حتى شي معلومة، فقط عرض ممل من ناس معندهمش مع التواصل نهائيا ، على الأقل اليوبي في اللول كان كيهدر بالدارجة ويفهمنا ونفهموه، أما هاد الطريقة ديال التواصل حاليا مع المغاربة راها كتشكل جزء كبير من هاد الاستهتار لي عند المغاربة بخصوص كورونا وإتباع أساليب الوقاية منو، مادام أن الوزارة ممسوقاش أصلا تشرح للمغاربة حتى شنو واقع وكيفاش وعلاش وبلا داك الهدرة ديال متحكم فيه، الوزارة ممسوقاش للمغاربة والمغاربة مابقاوش مسوقين للفيروس، والنتيجة حالات ديال الموت كثر وزيادة عدد الحالات بلا حتى شي معنى لي غادي يزيد يخنق البلاد ويردها لنقطة الصفر بحال كي وقع في طنجة اللي هي أصلا منطقة جوج ودابا ولات جوج أوس إتنان.

دابا ملي كنسمع راه عندنا خمس وفيات، هذا بالنسبة ليا ولبزاف مجرد رقم وإحصائيات، بحال ملي غادي نسمع راه كيموتوا ربعالاف في العام بالكسايد أو عشرالاف بالكارو، هادو كيبقاو غير أرقام، ولكن ملي كتشرح ليا الحالات شحال في العمر ديالهم وكيفاش حتى وصلهم الفيروس وفين تقاصو وشنو الأمراض لي كانت عندهم والحالة العائلية ديالهم، ملي غادي تقولي راه ماتت مرأة فالستينات كان عندها سكري مثلا وتقاصت بسباب زيارة ديال أحد أبنائها هنا راه كنولي كمتلقي معني بشكل مباشر وغادي نحس أنني الى مشيت عند الواليدة راه حتى أنا كنغامر بحياتها ونقدر نكون سبابها فأي وقت وغادي ندير مناقص، كذلك الى قلتي ليا تقاسو تلاتين فعيد ميلاد شي واحد ماتو منهم تلاتة كانو أب وأم وطفل صغير، راه التفاصيل كتخلي الواحد يتعاطف ويحس بأنه معندي بالامر كفرد وأنه الى محضاش راسو يمكن هادشي يوقعليه حيت كاين قواسم مشتركة بينو وبين الضحايا.

كاين إستهتار كبير بالفيروس عند المغاربة وهادشي سبابو وزارة الصحة وطريقتها فالتواصل لي حولات الأمر من فيروس خطير وقاتل لمجرد ارقام ناشفة كتعرضهم وحدة فجوج دقايق وتمشي ولي مابقات كتعني للمغاربة أي حاجة، مادام أنه مكاين حتى شي تفاصيل حقيقية وأوامر وإرشادات للمغاربة بالدارجة طبعا باش يفهو بعدا وباش يحسو بلي راه كنعيشو خطر حقيقي ماشي غير هدرة خاوية، راه وليتي تخرج للشارع بالكمامة كتبان بحال الى جاي من القمر بنادم ممسوق كاع وتاواحد مكيقوليه حتى شحال في الساعة علاش حيت كورونا مجرد أرقام ديال وزارة الصحة لي مقدراتنش تحول هاد الأرقام لحالات إنسانية فقدناها وفقدوها عائلاتها وأحبتها بسباب الإستهتار وعدم الإلتزام بالإرشادات.