وكالات //

صدمة كبيرة نزلات على جامعة ميشيكَان الميريكانية بعدما اكتشافت أن أهم وأعظم وثيقة عندها فالمكتبة وهي “مخطوطة كَاليليو” مزورة بيد شخص طلياني كان معروف فالقرن اللي فات بارتكابه عمليات تزوير كثيرة.

جامعة ميشيكَان قالت أنها اكتشفت الأمر من بعدما داز على الوثيقة المذكورة قرن كامل، و”المخطوطة” اللي فيها صفحة واحدة وكانو كيضنو بللي كاتبها بيديه “كَاليليو كَاليلي”، عالم الفلك والفيزيائي والمهندس الطلياني الشهير، وكانت فيها ملاحظاتو لأقمار كوكب المشتري من عام 1610.

حقيقة التزوير اكتاشفها نيك وايلدنكَ، المؤرخ فجامعة ولاية جورجيا واللي هو خبير فكشف التزوير فوثائق ومخطوطات من هاد النوع، وسبق ليه وكشف على تزوير سابق لشي وحدة أخرى من الوثائق اللي كانو كيعتاقدو بللي ديال نفس العالم “كَاليليو”.

نيك وايلدنكَ اكتاشف الموضوع بالصدفة بعدما شاف تصويرة ديال الوثيقة فالأنترنيت، ولاحظ أنها مكتوبة بنفس المداد، واخا المعروف على المخطوطة أنها تكتبات على جزئين، فاصل بيناتهم شهر.